Bandeira Nova Zelándia. Imajen/foti husi google

DILI, 02 setembru 2020 (TATOLI)– Peskadór Nova Zelándia ho inisiál JC   (tinan 67) rekoñese nia viajen husi Surabaya-Indonézia tun iha illa Liran, Provínsia Maluku Indonézia, ho intensaun atu mai Dili, Timor-Leste ho objetivu atu renova ninia vistu (visa).

Notísia Relevante : PNTL investiga sidadaun Nova Zelándia no Indonéziu tama ilegál ba Atauro

JH  dehan, iha tempu ne’ebé nia sai husi Liran aluga ró peskadór ho osan $200, atu mai Timor-Leste, maibé rona informasaun husi autoridade seguransa Indonézia katak, Timor-Leste implementa hela Estadu Emerjénsia (EE), ikus mai nia deside atu fila fali ba área Alor-Indonézia  nian la konsege no iha viajen nia laran derrepente ró ne’ebé sira uza aat iha tasi-laran.

Ikus mai JH deside tuun husi tasi-laran durante oras rua tenta atu nani ba tasi Atauro, maibé tanba laloran tasi boot halo nia mout iha tasi-laran, too ikus peskadór balun husi Atauro ne’ebé halo hela atividade peska maka ajuda fali iha tasi laran hodi lori ba Postu Administrativu Atauro, Munisípiu Dili.

JH tama ba área tasi Atauro nian iha loron 12 agostu 2020 iha tuku 11:25 Otl, no iha momentu ne’ebá populasaun no autoridade seguransa no ekipa médiku Ministériu Saúde halo kedas pasa revista ba ninia kondisaun saúde no halo apreensaun ba ninia sasán iha  tuku 2:35 madrugada, loron 13 agostu 2020.

Ba Agência Tatoli liuhusi komunikasaun iha rede sosiál, foin lalais ne’e, JH halo viazen husi Surabaya-Indonézia  mai too Liran gasta tempu loron-lima, maka too mai Timor-Leste.

“Ha’u atu mai Dili durante loron lima ho intensaun atu tama Timor-Leste hodi renova ha’u nia vistu (visa), maibé bainhira ha’u to’o iha Illa Liran-Indonézia, autoridade sira iha Liran informa ha’u katak Timor-Leste iha hela situasaun Estadu Emerjénsia no la autoriza kualkér sidadaun estranjeiru atu tama, no ha’u deside  di’ak liu hela iha Indonézia no deside atu fila fali ba Portu Migrasaun Alor-Indonézia nian atu  esplika ha’u nia situasaun, maibé tanba ró ne’ebé tula ha’u aat no mina fakar, ikus mai ha’u deside foti ha’u nia dokumentu sira hodi nani  kuaze oras rua liu maka peskadór sira hosi Atauro hetan no ajuda ha’u lori fali ba Atauro,” esplika JH.

JH hatutan, mezmu autoridade seguransa Timor-Leste konsidera nia viajen ne’e ilegál, maibé nia parte prova ho pasaporte no dokumentu ne’ebé nia iha ho intensaun nu’udar sidadaun di’ak atu koopera ho parte seguransa no ekipa saúde COVID-19 hodi rezolve problema ne’ebé nia hasoru.

“Ha’u toba iha ró ne’e bainhira liuhusi área Liran-Indonézia. Akontese bee nakonu iha ró laran, nune’e ha’u deside hatama hotu ha’u nia sasán sira ne’ebé ha’u lori ba iha plástiku ida, no ha’u hatene tiha ona kata ami dala ruma sei la toba iha Alor, maibé hafoin ami hamoos tiha, laloran mós komesa kalma fali bainhira ami hadeer, ró na’in ne’e hatudu uluk ba oin dehan, Alor maka ne’e. Ha’u hanoin Alor no ha’u mós hanoin katak, ida ne’e laloos, maibé ha’u mós kestiona ha’u foti ha’u nia sasán ne’ebé ha’u falun hodi haree fila fali se ha’u nia telefone sei funsiona ka lae, ha’u hateten ba ha’u nia aan katak kleur ona seidauk halo viajen, ha’u mós husu katak keta iha tasi ibun ruma karik, maibé ha’u la haree hetan buat ida, ha’u haree ne’e buat hotu nakukun, maibé ró na’in ne’e repete nafatin dehan Alor. Maibé hafoin ami diskute malu ha’u deside katak ami too iha ne’ebé de’it, ha’u sei deside atu haksoit tun no nani, sei deside atu foti risku,” esplika JH.

Segundu Komandante PNTL Munisípiu Dili, Superintendente, Euclides Belo dehan, hafoin halo tiha pasa revista ba JH, parte saúde haruka kedas nia hela iha kuarentena Otél Faról, Dili, presiza kumpre rega saúde nian livre ona husi COVID-19 maka parte PNTL sei haree kazu ne’e hodi koordena ho Servisu Migrasaun Timor-Leste  buka solusaun ba problema ne’ebé JH enfrenta tuir lei Timor-Leste.

Superintendente Euclides rekoñese sidadaun Nova Zelándia JH tama Timor-Leste ilegál, maibé nia iha pasaporte, tanba ne’e PNTL Dili sei aprezenta prosesu ne’e ba Servisu Migrasaun Timor-Leste maka sei haree hodi entrega fali ba Embaixada Nova Zelándia.

Jornalista   : Eugénio Pereira/Nelia Borges   

Editór            : Francisco Simões

HAKEREK NO HATÁN

Please enter your comment!
Please enter your name here