Prezidente Repúblika, Francisco Guterres Lú Olo, oferta tais ba Reprezentante OMS iha TL, Rajesh Pandav. Imajen/Palasiu PR.

DILI, 02 setembru 2020 (TATOLI)-Reprezentante Organizasaun Mundiál Saúde (OMS), Rajesh Pandav, kuarta ne’e despede ona Prezidente Repúblika, Francisco Guterres Lú Olo, tanba ninia mandatu servisu ramata ona iha Timor-Leste.

Rajesh Pandav mai Timor-Leste iha tinan 2011 hanesan asesór polítika iha Ministériu Saúde no iha tinan 2015 asume kargu hanesan Reprezentante OMS.

”Ha’u mai vizita kortejia ho Prezidente Repúblika ne’e tanba ha’u sei filafali ba servisu OMS nian iha Nasaun Nepal hanesan xefe reprezentante OMS nian,” informa nia ba jornalista sira hafoin halo sorumutu ho Xefe Estadu iha Palacio do Prezidente Bairru Pité Dili.

Reprezentante OMS ne’e sei husik hela nasaun ne’e iha loron 16 fulan-setembru 2020.

Durante servisu iha TL, OMS konsege atinje objetivu barak liliu dezenvolvimentu saúde públika ne’ebé liga ho kazu malaria, sarampu no rubela.

”Ita haree kazu malaria ne’ebé mak uluk aas tebes kuaze  rihun 200 kada tinan maibé agora kazu malaria laiha timor no ita mós konsege hameus moras sarampu kontrola ba moras rubela no mós ita kotrola ba moras sira seluk ,” nia hatutan.

Ba oras ne’e, nia  sujere ba Governu atu fó atensaun ba kazu COVID-19 iha Timor-Leste.

”Prezidente Repúblika apresia servisu OMS nian iha Timor-Leste liliu ba kazu COVID-19 nian no mós ba servisu saúde públika nian ne’ebé mak durante ne’e OMS halo ona ba Timor-Leste ,” hatutan Reprezentante OMS.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here