Grupu RNJDK hasoru malu ho autoridade Polísia iha Komandu Jerál PNTL, Cacicoli, Dili, 02 setembru 2020. Imajen/Eugénio Pereira

DILI, 02 setembru 2020 (TATOLI)- Maski Grupu Rezisténsia Nasionál Defende Justisa no Konstituisaun (RNDJK), ohin, hato’o deklarasaun ba Komandu Jerál Polísia Nasionál Timor-Leste (PNTL) hodi adia provizóriu sira-nia asaun “manifestasaun” kontra  Prezidente Repúblika, Francisco Guterres “Lú Olo”, maibé Komandu PNTL tuir lei kontinua fó nafatin lisensa seguransa ba asaun  ne’e iha kuakér tempu.

Notísia Relevante : Jenerál Lere nia intervensaun halo RNDJK adia “manifestasaun”

Portavós PNTL, Superintendente Xefe Arnaldo de Araújo, Komandu PNTL simu ona informasaun husi RNDJK hodi adia manifestasaun ne’e ho razaun tanba presiza tempu uitoan atu mobiliza manifestante husi munisípiu 12 inklui Rejiaun Administrativu Espesiál Oe-Cusse Ambeno (RAEOA).

Tuir loloos grupu RNDJK husu ona lisensa husi Komandu PNTL atu halo manifestasaun iha Tasi-Tolu, Dili, husi loron 4 to’o loron 18 setembru 2020, maibé RNDJK husu adia tanba konsidera iha presaun militár maka’as FALINTIL-Forsa Defeza Timor-Leste (F-FDTL).

 “Ami ko’alia kona-ba sira adia prosesu demonstrasaun, tanba kestaun seguransa sira rasik husu atu adia fali ba futuru, la hatene bainhira sira sei realiza. Maibé karik sira atu halo iha kualkér tempu sei mai hasoru fali ami hodi ko’alia fali ho polísia,” hateten  Arnaldo  de Araújo ba jornalista liuhusi konferénsia imprensa iha Komandu Jerál PNTL, Caicoli, Dili.

Kona-ba asaun emboskada ne’ebé membru F-FDTL sira halo, PNTL rasik la iha koñesimentu, tanba antes ne’e PNTL fó ona autorizasaun ba grupu RNDJK atu  realiza sira nia asaun tuir lei.

“Kona-ba ida ne’e ha’u la iha komentáriu,” hateten  Arnaldo hodi subliña tan, PNTL prontu asegura asaun ne’e hodi kumpre liberdade ema nian tuir Konstituisaun RDTL artigu 42 kona-ba liberdade reuniaun no manifestasaun nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here