Ponte Laleia troka naran Ponte ‘Nelson Mandela. Imajen/Espesiál

DILI, 02 setembru 2020 (TATOLI)-Ministru Obra Públika, Salvador Eugênio Soares dos Reis Pires, hateten Ministériu Obra Públika (MOP) laiha problema bainhira Governu deside muda naran Ponte Laleia hosi Nelson Mandela ba Dom Martinho Lopes.

Antes ne’e, eis Prezidente Repúblika no Primeiru-Ministru, Kay Rala Xanana Gusmão, sujere Ponte Laleia ne’ebé lokaliza iha postu administrativu Laleia, munisípiu Manatuto, muda naran ba Dom Martinho Lopes, maski iha ona desizaun hosi Konsellu Ministru.

“Depende ba Governu nia desizaun tomak, ha’u laiha problema ho naran,” tenik Ministru Salvador, kuarta ne’e, iha Palásiu Governu.

Tuir Ministru bainhira atu anula desizaun ne’e tenke ba fali Konsellu Ministru, tanba ne’e MOP sei koordena ho Gabinete Primeiru-Ministru atu haree ba asuntu ne’e.

“Hafoin rezolusaun ne’e aprovadu no publika iha Jornál Repúblika, entaun ofisialmente nia naran hanesan ne’e ona maibé bainhira iha anulasaun tenke mai fali iha Konsellu Ministru tanba nia sei vigora hafoin publika,” Ministru esplika.

Nia hatutan, maski iha ona pedidu verbál hosi Líder Nasionál, Xanana Gusmão, maibé MOP seidauk simu karta ruma kona-ba asuntu ne’e.

Iha loron 6 agostu, liuhosi reuniaun Konsellu Ministru aprova rezolusaun Governu ba atribuisaun naran ba ponte Laleia iha mota Laleia nia sorin lokaliza iha estrada nasionál A01, ho naran Nelson Mandela, ne’ebé hanesan antigu Prezidente Áfrika Súl, Premiadu Nobel Paz, no defensór boot kauza Timor-Leste.

Aprezentasaun Ministru Salvador ne’e hetan apoia hosi Ministériu Administrasaun Estatál (MAE) ne’ebé maka iha kompeténsia mós relasiona ho tau naran ba ponte no estrada sira.

Proposta ne’e submete ona iha komemorasaun Loron Internasionál Nelson Mandela iha loron 18 jullu, ne’ebé hanesan ninia loron moris.

Tanba ne’e, atu fó omanajen ba líder afrikadu ne’e, MOP liuhosi Diresaun Jerál halo kedan indetifikasaun ba ponte haat hodi hato’o ba Primeiru-Ministru no ikus mai hili tau naran eis Prezidente Áfrika Aúl Nelson Mandela.

Iha selebrasaun loron Nelson Mandela konta mós prezensa hosi antigu Prezidente no Premiadu Nobel Paz, José Ramos Horta no selebra hosi nasaun sira ho atribuisaun naran ‘Nelson Mandela’ ba ponte ne’ebé reprezenta obra no moris personalidade ne’e hanesan konstrutór ponte umanidade, mediasaun, ba rekonsiliasaun no paz.

Konstrusaun ponte ne’e hahú iha loron 18 Agostu 2016, ne’ebé toma konta hosi kompañia Shanghai Group Ltd hosi Cina, hafoin pasa iha prosesu aprovizionamentu ne’ebé han tempu kuaze tinan-rua.

Ba obra ne’e, Governu kontrata konsultór hosi Japaun, Filipina no Indonézia hodi kontrola obra. 

Projetu ne’e tama iha pakote I konstrusaun estrada Dili-Manatuto no pakote II konstrusaun ponte Manatuto liga ba Munisípiu Baucau. 

Projetu pakote I uza fundu empréstimu hosi Japan Internasional Cooperation of Agency (JICA) ho totál orsamentu millaun $48,3, enkuantu pakote II hosi fundu empréstimu Asian Development Bank (ADB) ho totál millaun $59,2.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here