Kontra atake entre Jogador husi Klube zigante Kapitál Dili Karketu Dili FC konsege halakon Sporting Clubo de Timor (SCT). Imajen/Hortencio Sanchez.

DILI, 02 setembru 2020 (TATOLI)-Klube zigante Kapitál Dili Karketu Dili FC konsege halakon Sporting Clubo de Timor (SCT) ho golu mihis 2-1 iha Kopa Federasaun Futeból Timor-Leste (FFTL) iha Estádiu Munisipál Dili, kuarta ne’e.

Ho vitória ne’ebé maka ekipa kapitál Dili hetan, iha posibilidade boot lori klube refere  atu hakat ba jogu oitavu finál.

Tanba iha jogu dahuluk ne’ebé halo ho klube Academica FC, Karketu manán ho golu mihis 2-1 nune’e mak sira akumula ona pontu hamutuk neen.

Golu vitória Karketu hatama husi Jogadór Celcio Costa iha minutu 43, no golu daruak hatama husi Mario Kefy iha minutu 80, enkuantu Sporting Clubo de Timor (SCT) marka hhusi Lesy Careca ‘63’.

Jogu ne’e dirije hosi árbitu Eufrasio Costa, Juiz Liña Filomeno da Silva, Elisio Lopes, árbitru rezerva Duarte Hendrique.

Ho rezultadu derota ne’ebé mak Sporting Clubo de Timor (SCT), Treinadór Moises da Silva, hateten maski lakon maibé satisfas ho jogadór sira tanba implementa duni tékniku ne’ebé maka nia orienta.

“Maski lakon maibé ha’u sente “puas” tanba Karketu ekipa primeira divizaun ne’ebé forte maibé ami konsege halo sira bok an la di’ak iha jogu laran,” informa Moises.

SCT foin jogu dahuluk tanba ne’e fiar katak iha jogu sira tuirmai sei kompete ho di’ak atu ultrapasa oitavu final.

Iha fatin hanesan Treinadór Prinsipal Karketu, António Timotio, relata sente kontente ho ekipa ne’ebé nia lidera tanba hakat ona pasu atu tama ba oitavu final.

“Jogu ohin ne’e ami hetan presaun maka’as tebes, maibé ami konsege manán,  ba oin ha’u sei esforsu hodi hala’o treinamentu ho di’ak nafatin ba jogadór sira nune’e bele hetan vitória,” nia hateten.

Iha jogu ne’e Karketu monu iha grupu C hamutuk ho Aitana FC, Porto Taibessi FC, SCT no Academica.

Jornalista : Hortencio Sanchez

Editór       : Agapito dos Santos