Ministru Koordenadór Asuntu Ekonómiku (MKAE), Joaquim Amaral . Imajen TATOLI/Osória Marques.

DILI, 01 setembru 2020 (TATOLI)-Ministru Koordenadór Asuntu Ekonómiku (MKAE), Joaquim Amaral hateten, ohin, MKAE halo koordenasaun ho Vise Primeiru-Ministru no Ministra Solidariedade Sosiál (MSSI) no Institutu Seguransa Sosiál (INSS) hodi halo planu oinsa ba implementasaun rekopresaun ekonomiku ne’ebé kontempla ba medida haat ne’ebé medida tolu ba MSSI no medida ida ba MKAE.

“Hosi medida tolu (3) ne’e sei monu iha MSSI nia responsabilidade tanba ne’e mak ami tenke koordena malu atu bele aselera no ezekuta programa ne’e ho di’ak. Medida ne’e mak atu ajuda ba kompañia sira atu hahú fali ho sira-nia atividade negósiu sira, atu ajuda setór formál sira hodi bele rejistu iha sistema Seguransa Sosiál (SS), no ikus liu mak ajuda sira ne’ebé mak retensaun katak sira-nia obrigasaun iha sistema Seguransa Sosial mak Governu ajuda sira hodi selu parte balun hanesan 10%,” dehan MKAE, Joaquim Amaral ba jornalista sira hafoin hala’o enkontru ho Vise Primeiru-Ministru ho nia estrutura tomak iha MSSI, Caicoli, Dili, tersa ne’e.

Joaquim Amaral hateten, medida hirak ne’e bele ajuda produtór ka agrikultór sira atu bele badinas halo toos hodi prodús produtu tanba merkadu mak kompradór. Iha situasaun ida ne’e, nia dehan, programa rekooperasaun  ekonómika sei sosa hahan sira ne’ebé mak tama ona iha lista no faan iha merkadu lokál no nasional, nune’e bele ajuda komersiante sira inklui bele ajuda mós sira ne’ebé mak halo toos.

Nia dehan, medida hirak ne’e sei halo koordenasaun mós ho Ministériu Saúde (MS) atu haree nia kompozisaun ba nutriente no kalori. Nia informa, Governu sei ajuda kada família ida sei hetan valór $25 ba fulan ida no família lima mak hamutuk iha uma ida-nia laran mak sei vezes $25 ne’e.

Aleinde ida-ne’e, governante ne’e afirma katak medida dahaat ne’e pertense ba MKAE nia koordenasaun mak programa ‘Sesta Bázika” nian. Programa ida-ne’e, oinsá atu buka no sosa hahan sira ne’ebé faan iha merkadu nasionál atu nune’e bele distribui ba ema povu ida-ida.

Tanba, nia dehan, iha tempu uluk fó osan $100 ba kada xefe família maibé agora universál entaun ema ida-ida iha direitu hetan hahan tuir osan ne’ebé mak atribui atu iha fulan novembru ka dezembru para iha aihan atu bele han.

Subsídiu ida-ne’e, nia dehan, atu ajuda iha situasaun defisil mantein sira-nia operasaun kompañia nia funsinamentu mezmu iha difikuldade maibé sira hahú la’o. Signifika iha traballadór ne’ebé sira tenke mantein tanba ne’e medida subsídiu ida-ne’e atu ajuda nune’e bele hakmaan kompañia sira au sira labele hapara sira-nia trablladór sira.

Bainhira sira hapara sira-nia kompañia sira mós iha nia konseskuénsia naruk, tanba ne’e mak sira ne’ebé mak seidauk rejistu, sira iha obrigasaun atu rejistu. La’ós ajuda de’it maibé iha nia objetivu seluk ne’ebé atu bele regulariza sira.

Sistema seguransa sosiál ne’e, nia dehan, hanesan estadu halo atu proteje ema ho kompañia sira iha sistema protesaun Seguransa Sosiál ne’ebé mak Estadu harii. Entaun sira ne’ebé sai benefísia ba sistema ne’e, sira iha kontribuisaun voluntariu ida iha mínimu, nune’e mós kompañia sira ne’ebé fó benefisia mós tenke kumpre obrigasaun rejistu hodi bele selu traballadór nia konribuisaun sosiál.

“Bainhira loron ruma mak sira reforma sira iha kondisaun mak iha SS ne’ebé mak sei proteje sira. Medida hirak ne’e la’ós ba kurtu prazu maibé mós ba longu prazu,” nia dehan.

Entretantu, Prezidente Administrasaun Institutu Nasionál Seguransa Sosiál (INSS), Longuinhos Armando Leite, hateten INSS prontu asegura desizaun Governu nian ba planu rekooperasaun ekonómiku liuliu ba medida tolu ne’e.

“Planu rekooperasaun ekonómiku ne’e iha medida tolu (3) mak hanesan apoiu ba emprezariu, apoiu ba setór naun formál, no dispensa kontributivu hamutuk ne’ebé mak $41,5 maibé osan hirak ne’e sei iha prosesu nia laran tanba osan ne’e sei lori ba Parlamentu Nasionál,” Prezidente Administrasaun INSS, Longuinhos Armando Leite, hateten.

Nia dehan, medida tolu ne’e mak sei entrega ba MSSI liuhosi INSS hodi halo pagamentu maibé INSS seidauk hatene osan ba medida tolu ne’e nafatin iha MKAE ka haruka ba INSS mak halo pagamentu. Tanba ne’e, nia dehan, hein de’it prosesu tanba foin mak halo koordenasaun entre MKAE ho MSSI-INSS.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here