Hein mak hein. Hein be hein. Loron 30 agostu 1999 to’o duni mai no mai tebes duni. Loron ukus ba tinoroan sira hakotu nia destinu hamriik ona iha oin. Membru FALINTIL sira ho populasaun ne’ebé konsentra iha Odelgomo habrani aan hakat sa’e ba Bobonaro vila hodi fó direitu votu ba auto determinasaun hodi hili Timor-Leste nia destinu.

Mezmu haleu hosi Militár Indonézia no Milisia pro-autonomia maibé ha’u ho kolega sira seluk la hakfodak hodi fó ami-nia votu iha loron istórika ida-ne’e. Hafoin ezerse tiha ami-nia dever hanesan timoroan hodi ezerse ami-nia direitu voti, ikus mai ami fila direta ba Odelgomo hodi hein rezultadu votasaun ne’ebé sei fó sai.

 DILI, 02 setembru 2020—Durante tinan 23 nia laran FALINTIL reziste iha ailaran hodi luta no funu hasoru invazór Indpnézia ho objetivu ida luta ba povu no Timor-Leste nia independénsia. Iha tinan 1999, luta FALINTIL iha ailaran halo tinan 24, UNAMET fó dalan ba timoroan sira atu hili nia detsinu rasik, membru FALINTIL sira mós tama vila laran hodi ezerse sira-nia direitu votu ba Timor-Leste nia atudeterminasaun.

Eis membru FALINTIL iha Rejiaun-V, Manuel “Mau-Hura” Gonçalves. Imajen/Espesiál.

Eis membru FALINTIL ida iha Rejiaun-V, Manuel “Mau-Hura” Gonçalves, haktuir ninia sasin ne’e ba jornalsita Agência TATOLI, Cancio Ximenes, iha ambítu komemorasaun Loron Konsulta Populár ba dala-21 (30 agostu 1999-30 agostu 2020), tersa (02 setembru 2020). Eis membru FALINTIL, Manuel “Mau-Hura” Goncalves, hasasin ninia memória istória pasada;

Hafoin Estadu Indonézia Anunsia Opsaun Rua

Hafoin Prezidente Indonézia, B.J Habibie, deklara fó opsaun rua ba Timor Timur (timoroan) hodi hili iha Konsulta Populár, iha fulan abril 1999, iha ailaran, ha’u ho guerilleiru sira seluk hamutuk ho Vise Sekretáriu Rejiaun V, Coli Aty, atuál Xefe Estadu Maior F-FDTL hahú konsolida opsaun Ukun Rasik Aan ba knua sira ne’ebé FALINTIL bele asesu.

Konsolidasaun ne’e hahú hosi Fatu Besi (Ermera) no Rai Maten Sare hodi fahe serbisu katak Komandante Rejiaun V, Virgílio dos Anjos “Ular Rihik” hamutuk ho Komandante Unidade Norte, Vicente “Roque”, hamutuk ho estrutura sira seluk sei konsentra iha area Norte no Vise Sekretáriu Rejiaun V, Coli Aty, Komandante Unidade Sul, Domingos Augusto “Deker” hamutuk ho estrutura baixu sira seluk sei konsentra ba área Sul. Hafoin fahe serbisu ne’e, ekipa Sul ne’ebé atan ha’u mós hola parte hahú dezloka ba Kosta Sul.

Serbisu ne’ebé ami hala’o hahú hosi postu tuan Cailaco (Maliana) mak fó sensibilizasaun hodi esklarese ba populasaun ne’ebé hela iha área ne’e no área vijiñu sobre opsaun rua ne’ebé Estadu Indonézia fó hodi hili opsaun Ukun Rasik Aan hanesan desizaun ne’ebé di’ak liu ba futuru Timor-Leste ne’ebé di’ak liu. Depois de fulan ida iha postu tuan, iha fulan maiu 1999 ekipa hakat ba Odelgomo hodi hala’o serbisu hanesan durante semana tolu. Hosi Odelgomo ekipa direta ba Mapeop, Suku Sibuni hodi kontinua haklaken kona-ba opsaun Ukun Rasik Aan (URA). Durante semana rua iha Mapeop, ekipa halo sensibilizasaun hodi kobre área sira ne’ebé besik Mapeop.

Iha Mapeop, ekipa halo kontaktu ho estafeta hodi kolabora ho forsa UN ne’ebé submete iha UNTAET atu bele hala’o kontaktu ba dame (kontak damai) ida entre FALINTIL ho TNI no POLRI iha Guda Tas. Kontaktu dame ne’e, akontese iha inisiu juñu (1999) dadeersan iha fatin Sekolah Dasar (SD0 ida Guda Tas nian. Kontaktu dame ne’e FALINTIL husu atu Militár Indonézsia bele respeita direitu sidadaun nia eskolla no husu atu bele fó seguransa ba sidadaun ne’ebé sei ba tuir votasaun hodi fó sira-nia votu.

Kontaktu dame ne’e rasik la’o ho susesu. Katak, militár Indonézia (TNI no POLRI) prontu hala’o knaar tuir akordu 5 de Maiu nian. Hafoin kontaktu ba dame ne’e, ekipa fila fali mai Mapeop hodi kontinua halo sensibilizasaun opsaun Ukun Rasik Aan ba komunidade sira. Semana ida iha Mapeop, ekipa la’o fali mai Odelgomo hodi prepara ba selebrasaun loron FALINTIL 20 de agostu 1999.

Iha selebrasaun ne’e, populasaun rihun ba rihun halibur iha fatin konsentrasaun Odelogomo. Populasaun hirak ne’e, mai hosi Atsabe, Covalima, no Maliana (Municipio Bobonaro). Oportunidade ida-ne’e hetan aproveitamentu makaas hosi FALINTIL hodi haklaken kle’an liu kona-ba opsaun Ukun Rasik Aan, iha Konsluta Populár 30 agostu 1999 ba sentru votasaun vota karik, hili ka tú-kuak surat-tahan Ukun Rasik An nian ne’e.

Hein mak hein. Hein be hein. Loron 30 agostu 1999 to’o duni mai no mai tebes duni. FALINTIL sira ho populasaun ne’ebé konsentra iha Odelgomo habrani aan hakat sa’e ba Bobonaro vila hodi fó direitu votu ba auto determinasaun hodi hili Timor-Leste nia destinu. Mezmu haleu hosi Militár Indonézia no Milisia pro-autonomia maibé ha’u ho kolega sira seluk la hakfodak hodi fó ami-nia votu iha loron istórika ida-ne’e. Hafoin ezerse tiha ami-nia dever hanesan timoroan hodi ezerse ami-nia direitu voti, ikus mai ami fila direta ba Odelgomo hodi hein rezultadu votasaun ne’ebé sei fó sai.

Anunsiu Rejultadu Konsulta Populár

Iha 04 de setembru 1999, loron haksolok ne’e to’o mai duni no iha Odelgomo hanesan mós konsentrasaun iha fatin seluk FALINTIL ho populasaun ne’ebé konsentra ba, populasaun sira haklalak hodi tebe no dahur. Populasaun balun hakilar no hakilar. Sente lalehen sai sira-nian, sira hakilar rai-luli Timor-Leste ne’e atu nakfera sal-sala “Viva Timor-Leste” no sira-na’in hatán sira-nia lian “Viva, Vivaaaa…” ho histeria, tanba funu durante tinan 24 nia laran be nakonu ho terus oinoin, finalmente ohin (04 setembru 1999) rejista ho vitória liuhosi votasaun.

Paska anunsia rezultadu referendu ne’e, situasaun sai manas uitoan tanba hetan reajen hosi Milisia ho Militar Indonézia sira ne’ebé la simu realidade ba sira-nia “lakon” ne’e. Entaun, dala ida tan, FALINTIL ezerse ninia funsaun hanesan “Bee” hodi asegura “Ikan” sira iha bee laran, liuhosi operasaun hodi ba tiru malu ho Milísia no Militár Indonézia iha Bobonaro iha luron bo’ot dirasaun Bobonaro Maliana no Atsabe.

Iha operasaun ne’e, konsege trava evakuasaun obrigatóriu ema Timor ba Timor Osidental no konsege hadau kilat SP ida. Hafoin domina tiha Bobonaro vila, iha fulan stembru 1999 nia rohan, FALINTIL ho populasaun tomak mak iha Odelgomo muda mai Bobonaro vila hodi hela iha ne’ebá durante fulan rua antes, hafoin iha fulan novembru tinan 1999 ami muda ba konsentra iha fatin konsentrasaun FALINTIL nian iha Rai-Husar Aileu.

Tinan 2002: Hili Vida Sivil

Iha tinan 2002 bainhira ekipa konjunta ne’ebé kompostu hosi forsa militár Portugés no kuadru superior FALINTIL nian hala’o entrevista ba kada membrus FALINTIL hodi husu ami-nia  eskolla hakarak nafatin iha FALINTIL hodi transforma aan ba forsa Exersito profesionál ho naran FALINTIL-Forsa Defeza Timor-Leste (F-FDTL) ka reintegra ba vida sivil, ha’u hamutuk ho kolega sira seluk inklui Comandante Samba Sembilan no atuál Prezidente Repúblika, Francisco Guterres “Lú Olo” hili dalan ba vida sivil. Motivasaun ne’ebé halo ha’u hili dalan ba vida sivil mak kontinua estudu no hakarak besik liu no hamutuk ho família.

Maibé, infelismente kuandu mai no tama ona iha vida sivil ne’e, ha’u ba hasoru Ministru Edukasaun, Pe. Filomino Jacob, hodi ko’alia kona-ba oportunidade ba kontinua estudu ne’e. Iha biban ne’e, ha’u hetan resposta katak orsamentu laiha. Situasaun ne’e halo ha’u triste tebes tanba altura ne’ebá kondisaun finanseiru mós la estavel, aumenta tan laiha serbisu halo terus ne’e sai kompletu kedas. Maibé depois fulan rua (2) moris hanesan sidadaun baibain rona informasaun hosi kolega balun kona-ba Chabb Security entaun koko ba serbisu hanesan kasual antes ba lokaliza permanente iha Embaixada Australia durante tinan ida (1).

Hafoin sai hosi servisu hanesan security, hanesan xefe família, ha’u la nonook de’it hodi buka moris hanesan loke Billiard iha Delta I, Elemloi nia kotuk. Bainhira krize 2006, ha’u ba serbisu hamutuk ho jornalista Maxsthal ho José Belo hanesan freelance. Iha 2007, kontinua serbisu iha Parlamentu Nasionál hanesan Xefe Gabinete iha Bankada PSD. Iha 2008, ha’u realiza ha’u-nia mehi hodi kontinua estudu iha Universidade da Paz (UNPAZ) iha Dixiplina Siéncia Ekonomia. Iha 2009, hamutuk ho kolega lubun ida forma Partido Partidu Dezenvolvimentu Nasionál (PDN).

Iha 2011, serbisu iha RDP4 projetu ida hosi Comisaun Europeia, iha 2012 ramata kursu Strata 1, iha 2013 sai hanesan Dosente iha UNPAZ, iha 2015 ba kontinua Mestradu (S2) iha Universitas Ciputra Surabaya ho diciplina Entrepreneurship, iha 2019 tuir bolsu estudu nebe Universitas Brawijaya Malang oferese ba Timor oan no grasa a Deuz husi kandidatu lubun ida hau hetan priveleigu hodi manan bolsu estudu ne’e mesak ba Programa Doutoramentu S3 Dixiplina Gestaun (agora daudaun hala’o profisaun hanesan dosente no empreendedorizmu=kewirausahaan).

Mehi ba Futuru

Mehi ne’abé ha’u iha mak oinsá bele liberta povu hosi ki’ak no mukit liuhosi dedika aan iha área edukasaun. Ha’u fiar katak ho disiplina siéncia ne’ebé ha’u iha, sei tulun Estadu hodi forma timoroan hodi harii sosiedade ne’ebé iha sivilizasaun ba moris prosperu.

Tanba ne’e, ha’u-nia vizaun ba futuru Timor-Leste nian mak ha’u husu; (1) atu VIII Governu Kontitusionál ka Governu ne’ebé sei mai hodi fó prioridade ba edukasaun mak hanesan loke eskola téknika vokasionál foun no transforma eskola sekundária ba eskola téknik vokasionaál, fó bolsu estudu liuhosi Ministériu Edukasaun ka FDCH tuir disiplina siéncia ne’ebé terminandu hosi Estadu liuliu foka ba área ne’ebé Timor-Leste presiza, dezenvolve setór turizmu tantu hotelaria, paisajem, kulturál no relijiozu, fó atensaun ba empreja pequena, mikro no mediu tanba sira maka liman ne’ebé tutan produtu hosi fabrika.

Tanba ne’e, ha’u-nia mensajen ba foinsa’e sira mak oinsá sira aproveita ukun rasik aan ne’e hodi hakas aan ba eskola, badinas iha estuda, labele halo hotu sira-nia tempu ho halimar game tanba futuru sei la mai hamnasa ho ita bainhira ita la prepara aan ho diak. Nasaun ne’e nia aliserse maka foinsa’e sira, tan-ne’e husu atu sira bele tuir formasaun vokasionál, lingua, komputador no administrasaun hodi hasoru Asean Economic Community wainhira Timor Leste adere ona ba ASEAN.

Joventude tenke refleta ba filozofia hosi Grande Heroi Nicolau Lobato katak “Ultima Bala é minha vitoria” ne’ebé sai hanesan liafuan patriotizmu hodi enkoraja Joventude loriku aswa’in iha tempu rezisténsia hodi hamriik iha oin hasoru bala. Ohin laiha ona funu ho arma tanba ita hetan ona Liberdade. Maibé funu foun ne’ebé joventude sira sei enfrenta mak oinsá bele liberta povu hosi mukit no funu ida-ne’e todan liu ami-nian. Tanba, uluk ami hakilar de’it “Mate ka Moris Ukun Rasik Aan” maibé ohin iha joventude sira nia kbaas, Timor nia futuru sei entrega katak sira maka sei sai estafeta ba Timor nia moris di’ak. Hakat ba oin, hahú ohin.

Jornalista: Cancio Ximenes

Editór: Agapito dos Santos

 

 

HAKEREK NO HATÁN

Please enter your comment!
Please enter your name here