DILI, 02 setembru 2020 (TATOLI)– Banku Nasionál Komérsiu Timor-Leste (BNCTL, sigla portugés) aprezenta proposta kapitalizasaun liuhosi finansiamentu Governu ba Konsellu Ministru (KM).
“Konsellu Ministru asiste aprezentasaun ida hosi Konsellu Administrasaun Banku Nasionál Komérsiu Timor-Leste kona-ba Proposta Kapitalizasaun liuhosi finansiamentu Governu ba períodu tinan 2020 to’o 2022,” relata Ministru Prezidénsia Konsellu Ministru, Fidelis Manuel Leite Magalhães, iha Palásio Governu, kuarta ne’e.
Governante ne’e dehan, kapitalizasaun ne’e ho hanoin atu serví hanesan alavanka ba aumentu konsesaun signifikativu ba kréditu to’o tinan 2022, nune’e bele apoiu modernizasaun infraestrutura banku no eleva kapasidade rekursu umanu ho forma aumenta númeru kliente no hadi’a kualidade servisu ne’ebé presta ona no sai prinsipál banku komersiál iha país.
Responsável sira aponta mós retornu porsentu 50 hosi valór ne’ebé injetadu hosi Estadu.
“Reprezentante BNCTL aprezenta mós analiza komparativu ida ho banku privadu seluk ba evolusaun kreximentu depózitu no kréditu hosi 2011 to’o agora no planu estratéjiku to’o tinan 2022,” haktuir Ministru Fidelis.
BNCTL nu’udar sosiedade anónima ho kapitál tomak mesak públiku de’it, ne’ebé Estadu maka sai nu’udar asionista úniku no ninia objetivu maka prestasaun servisu bankáriu no finanseiru ho hanoin atu hamenus moris-ki’ak no favorese dezenvolvimentu atividade ekonómika iha territóriu nasionál tomak.
Nune’e mós, hodi fornese asesu servisu finanseiru ba populasaun no empreza mikro no ki’ik, no médiu sira tantu iha área urbana no área rurál sira.
Iha tinan 2002, kapitál ne’ebé Governu prevee ba BNCTL hamutuk millaun $25, bainhira sei eziste mikro-finansa, hafoin iha 2011 transforma ba BNCTL tuir dekretu lei 3/2011.
Millaun $25 ne’e Banku Komérsiu ne’e uza halo operasaun no uza halo negósiu hodi hetan lukru no hosi totál ne’e akumula millaun $13 ne’ebé BNCTL konsege fó fila ba Estadu.
Durante tinan-hitu nia laran Banku ne’e konsege kobre lukru besik millaun $15.
Iha tinan 2019, Governu aloka ba BNCTL hamutuk millaun $5 no fó ona kréditu hamutuk millaun $57,4 ba kliente 10.039 iha 2019, ne’ebé osan kréditu maihosi depózitu kliente.
Hosi kréditu ne’ebé fó iha tinan 2019 no kréditu sira ne’ebé antes konsidera ativu hela iha 2019, BNCTL hetan rendimentu kuaze millaun $8.
Jornalista: Antónia Gusmão
Editora: Julia Chatarina
