Aniceto Guterres, Prezidente Parlamentu Nasional.Imajen/Antonio Goncalves

DILI, 02 setembru 2020 (TATOLI)—Parlamentu Nasionál, ohin, aprova projetu-deliberasaun Komisaun Permanente nian hodi fixa diskusaun no votasaun ba aban kona-ba renovasaun deklarasaun Estadu Emerjénsia iha territóriu nasionál tomak.

Notísia Relevante: Konsellu Superiór Defeza no Seguransa konkorda estensaun Estadu Emerjénsia

Hafoin Prezidente Repúblika, Francisco Guterres “Lú Olo” rona hanoin sira hosi membru Konsellu Estadu no membru Konsellu Superiór Defeza no Seguransa, enkamiña hanoin sira-ne’e ba Parlamentu Nasionál iha loron 2 setembru.

Parlamentu Nasionál simu pedidu autorizasaun ne’e liuhosi mensajen, Prezidente Parlamentu Nasionál Deputadu, Aniceto Longuinhos Guterres Lopes, konvoka plenária Komisaun Permanente nian hodi aprova projetu deliberasaun númeru 8/V (2a).

Hafoin halo apresiasaun ba projetu deliberasaun nú 8/V (2a) Komisaun Permanente nian ho rezultadu votasaun  a-favór 19 kontra 0 no abstensaun 7.

“Ho nune’e projetu-deliberasaun Komisaun Permanente nian ho númeru 8/V (2a) kona-ba konvokasaun hosi Parlamentu Nasionál pasa. Ho ida-ne’e aviza kedas ba deputadu sira aban, 03 setembru 2020, iha plenária estraordinária atu halo apresiasaun ba pedidu autorizasaun hosi Prezidente Repúblika kona-ba renovasaun deklarasaun Estadu Emerjénsia iha territóriu nasionál tomak,”  Prezidente Parlamentu Nasionál, Deputadu Aniceto Longuinhos Guterres Lopes anunsia liuhosi plenária Komisaun Permanente nian, kuarta ne’e.

Prezidente PN fó-sai katak, Governu fo hikas fali atu halo renovasaun ba ba Estadu Emerjénsia ho medida ne’ebé hanesan.

Prezidente Repúblika husu pedidu autorizasaun ba Parlamentu nasionál bazeia ba alínea g konjuga ho artigu 25 Konstituisaun RDTL no artigu númeru 1,9, 10, 11, , 15 no 27 hosi Lei númeru 3/2008, 22 fevereiru kona-ba Rejime Estadu de Sítiu no Estadu Emerjénsia, ho objetivu renova deklasaun Estadu Emerjénsia iha territóriu nasionál tomak, ho razaun iha subsisténsia situasaun kalamidade públika ba períodu loron 30.

Pedidu Prezidente Repúblika nian husu renovasaun ho ninia durasaun hahú hosi 00 oras iha 5 setembru 2020 (sábadu) termina iha 23.59 oras iha loron 4 outubru 2020 (domingu) iha territóriu nasionál tomak hodi suspende direitu balun ho parsialmente tuir mai ne’e:

a. Sirkulasaun internasionál, sei estabele kontrolu sanitáriu iha portu, aeroportu ka postu fronteira Terrestre, atu impede moras ne’e tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia, nune’e mós toma medida nessisária asegura sirkulasaun internasionál ba bens no serbisu esensiál sira

b. Liberdade sirkulasaun, no fixasaun rezidénsia ba kualkér pontu iha territóriu nasionál sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisíliu.

c. Direitu rezisténsia, kualkér atu (ato) rezisténsia ativa ka pasiva emanda hosi autoridade públika kona-ba ezekusaun Estadu Emerjénsia.

Razaun prezidente Repúblika, Francisco Guterres “Lú Olo” husu revonasaun deklarasaun Estadu Emerjénsia tanba Timor-Leste geografikamente besik Repúblika Indonézia ne’ebé rejista ona mais rihun 160 kazu kofirmadu COVID-19, ema na’in-7000 mak mate hosi provínsia 34 iha territóriu Indonézia nian inklui provínsia viziña Timor Osidentál (Nusa Tenggara Timur-NTT).

Nune’e mós nasaun viziña Austrália ne’ebé rejista ona liu rihun 25 kazu infesaun konfirmadu no liu ema na’in-600 mak mate ona.

 Jornalista: Evaristo Soares Martins

Editór: Cancio Ximenes

  

HAKEREK NO HATÁN

Please enter your comment!
Please enter your name here