Ofisiail Funsionariu husi Ministeriu Solidaderidade kontinua atende no halao pagamentu subsidiu $200 ba komunidade sira. Imajen/Antonio Goncalves

DILI, 01 setembru 2020 (TATOLI)-Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten rezultadu análiza ba reklamasaun daudaun ne’e purvolta 3.910 hosi totál reklamasaun loloos hosi munisípiu 12 inklui Rejiaun Administrativa Espesiál Oé-Cusse Ambeno (RAEOA) hamutuk 15.774.

Notísia Relevante: Pagamentu subsídiu faze daruak sei realiza iha agostu nia rohan

Rui Exposto hateten hosi 15.774 ne’e, Munisípiu Dili mak boot liu ho reklamasaun purvolta 4.786 no tuir mai mak purvolta 1.812.

“Reklamasaun hirak ne’e ami hatama iha dijitalizasaun entaun ita servisu mós la’o tuir internete. Bainhira internete lentu mak ita tenke hein. Reklamasaun ami foin halo análiza purvolta 3.910,”, Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, ba jornalista sira iha nia knaar fatin MSSI Caicoli, Dili, tersa ne’e.

Nia dehan, hosi rezultadu verifikasaun ka analiza ba reklamasaun hamutuk 3.910 ne’e, mai hosi Munisípiu Baucau, Ainaro, Covalima, Lautem, Liquiça, Manatuto no Manufahi.

Diretór ne’e haktuir,  bainhira halo análiza hotu sei bolu fali Ministériu Adminitrasaun Estatál (MAE) ho nia reprezentante hamutuk MSSI mak hodi haree naran reklamasaun sira ne’ebé mak elizivél atu simu subsídiu ne’e.

Tanba ne’e, nia husu deskulpa tanba MSSI labele responde pagamentu iha tempu badak nia laran tanba reklamasaun ne’e tenke halo analiza di’ak bazea ba lei sira liga pagamentu nian.

“Ho ida-ne’e, ha’u husu deskulpa tanba MSSI labele responde iha tempu badak tanba reklamsaun ne’e ita tenke halo análiza di’ak bazea ba lei sira liga ba pagamentu. Tanba ne’e sei  iha prosesu nia laran maibé Governu nafatin promote katak Governu sei selu,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here