Sekretáriu Estadu Ambiente, Demétrio do Amaral de Carvalho, partisipa konsultasaun liña ministeriál kona-ba projetu Intra ACP GCCC+ no PACKERS. Imajen/Mídia SEA.

DILI, 01 setembru 2020 (TATOLI)-Uniaun Europeia (UE) no Sekretaria Estadu Ambiente (SEA) hala’o konsultasaun inisiál ho liña ministeriál kona-ba projetu Intra ACP GCCC+ no Adaptasaun Pasífiku ba Mudansa Klimátika no Dezenvolvimentu Reziliénsia (PACERS-Pacific Adaptation to Climate Change and Resiliience Buliding).

“Modalidade finansiamentu ba projetu ne’e hosi Uniaun Europeia ho  kategoria mikro finansiamentu maibé importante ba Timor-Leste tanba nia benefisiáriu bele direta ba komunidade,” refere nota imprensa ne’ebé Agência Tatoli asesu, iha tersa ne’e.

Sorumutuk ne’e atu introdús projetu refere ba liña ministeriál sira ne’ebé maka identifika ona hanesan parte interesada (stakeholders) atu tau hamutuk idea kona-ba metodolojia atuasaun ba projetu ne’e iha suku Haupu, postu administrativu Letefoho, munisípiu Ermera no  suku Larisula, postu administrativu Baguia, munisípiu Baucau tuir sistema administrasaun ne’ebé iha ona no polítika setorál.

Objetivu introdusaun ne’e ko’alia kona-ba intensifika lala’ok intervensaun liña miniteriál ba implemetasaun sira perante bee-moos “Riparian Vegetation“ no identifika hamutuk lala’ok koordenasaun ne’ebé iha ona hodi asegura sustentablidade projetu no kapasitasaun komunidade atu jere rasik reziliente ba efeitu alterasaun klimátika.

Governu iha ona esperiénsia kooperasaun ambiente liuhosi DNAK no University south of Pacific hodi implementa hela projetu tolu hanesan projetu rua iha faze konstrusaun hanesan Uatulari, munisípiu Baucau no ida inagura ona.

Projetu Intra ACP GCCC+ PACERS hanesan projetu ne’ebé mak funda hosi UE ho objetivu atu atinje reziliénsia ba mudansa klimátika iha nasaun vulnerável sira iha Africa Caribean no Pacific inklui Timor-Leste liuhosi Universidade Sudeste Pasífiku (USP) no Fiji sai hanesan nasaun partisipante atu implementa projetu refere.

Atividade ne’e sei implementa iha nível suku maibé sei la’o tuir padraun koordenasaun administrativu ne’ebé estabelese ona iha nasionál no sub-nasionál to’o komunidade atu foka ba setór bee-moos no reparian vegetation.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here