DILI, 01 setembru 2020 (TATOLI)— Komisaun Instaladora Desterradu Ataúru (KIDA) hato’o proposta ba Gabinete Apoio Sociedade Civil (GASC)-Gabinete Primeiru Ministru (GPM) hodi bele halo konsolidasaun ba eis desterradu sira.

Koordenadór Gabinete de Apoio Sociedade Civil (GASC), Filipe da Costa, hala’o enkontru ho Prezidente Komisaun Instaladora ba Eis Desterradu Ataúru (KIDA), Agostinho Gregório Ramos, no ekipa iha salaun enkontru GASC, iha loron 27 agostu 2020.

Iha enkontru ne’e KIDA hato’o proposta ba GASC atu buka apoia hosi Governu hodi bele konsolida fali desterradu Atauro sira no troka ideia kona-ba kontribuisaun eis desterradu Ataúru nian iha dezenvolvimentu nasionál.

Koordenadór GASC, Filipe da Costa esplika kona-ba fundu apoia ba organizasaun rezisténsia ne’ebé Parlamentu Nasionál aprova iha 2019 ho totál $1,500,000.00 no esplika kle’an kona-ba fundu ne’e nia ezekusaun to’o ohin loron.

Nune’e mós koordenadór GASC esplika kona-ba ninia vizaun oinsá atu servisu hamutuk ho organizasaun rezisténsia sira.

“GASC iha 2019 no 2020 iha vizaun tolu ba organizasaun rezisténsia sira, dahuluk, organizasaun rezisténsia sira tenke konsolida-aan ka identifika fali sira-nia membru. Daruak, organizasaun sira-nia instituisaun tenke forte, tenke iha sede ho nia servisu administrasaun tenke la’o ho di’ak, no ikus mak órgaun rezisténsia sira presiza orienta-aan ba hadi’ak ekonomia membru sira nian,” tenik Koordenadór GASC, Filipe da Costa, ne’ebé Agência TATOLI asesu liuhosi komunikadu imprensa, segunda ne’e.

GASC observa katak organizasaun rezisténsia 20 ne’ebé oras ne’e servisu hamutuk ho GASC hala’o implementasaun atividade ho di’ak no balun hahú benefísia ona ba sira-nia membru.

Koordenadór GASC, Filipe da Costa énfaze katak vizaun estratéjika GASC ba organizasaun rezisténsia iha tinan-2021 mak iha rua, ida mak organizasaun tenke haree ba ben-estar ekonomia no ben-estar sosiál membru nian, no seluk mak tenke haree mós ba membru organizasaun-nia oan sira atu sira mós bele organiza-aan, tau matan ba edukasaun no haree ba sira-nia profisionalizmu.

Nia mós iha mehi-ida atu bele karik organizasaun rezisténsia sira bele iha forum ida (Forum Organizasaun Rezisténsia) atu bele sai hanesan fatin koordenasaun entre organizasaun rezisténsia ne’ebé eziste, fatin halo advokasia, fatin hodi ema bele konsulta, fatin atu karik ema hakarak halo peskiza, fatin ba edukasaun sidadania no sívika, inklui fatin ema rezisténsia-nia oan sira bele organiza-aan di’ak liután.

Koordenadór GASC sujere KIDA atu estuda didi’ak vizaun no sujestaun hirak ne’e no bele karik konsidera iha sira-nia atividade sira-ne’ebé sei halo iha tinan-oin.

“Hanesan organizasaun sosiedade sivíl ida, KIDA mós iha papél atu tulun governu hodi sai husi problema nasionál sira, hanesan kiak no mukit ne’ebé sei aas, má-nutrisaun, inseguransa ai-haan, no seluk seluk tan nune’e importante tebes hodi haree ben-estar ekonomia no sosiál ba membru sira, halo atividade sira ne’ebé bele hasae rendimentu família membru nian, apoiu edukasaun ba membru-nia oan sira, no fornese ba treinamentu ruma ba membru sira,” Filipe da Costa hateten.

Entretantu, Prezidente ba Komisaun Instaladora ba Eis Desterradu Ataúru (KIDA), Agostinho Gregório Ramos apresia vizaun no sujestaun hirak ne’e no informa liután hodi dehan sira estabelese ona KIDA ne’e iha 23 fevereiru 2020 atu konsolida eis desterradu Ataúru sira kuaze 7000 ne’ebé rezidente iha munisípiu tomak.

“Ami-nia proposta ba GASC ba tinan-oin mak ami iha programa haat importante hanesan, hahú konsolidasaun ba eis desterradu Ataúru iha territóriu tomak, daruak, hala’o kongresu munisipál, liutiha hala’o kongresu nasionál ho nia relatóriu ezekusaun, no dahaat programa atividade ba organizasaun KIDA ba tinan-2021,” dehan Agostinho Gregório Ramos.

Iha tempu badak KIDA hahú halo preparasaun ba kongresu sira iha fulan-janeiru to’o jullu 2021, maibé nu’udar komisaun instaladora no nafatin halo konsolidasaun ba eis desterradu Ataúru sira.

“Ami-nia prinsípiu mak hametin istória no kontribui ba dezenvolvimentu Timor-Leste,” dehan Eis Desterradu Ataúru ne’e.

Agostinho subliña, KIDA-nia planu mak oinsá atu kontribui programa-ida di’ak iha setór ekonomia ba eis desterradu Ataúru liu-liu programa iha setór agrikultura no identifika, halibur sira hotu hodi hakbesik programa KIDA nian hodi eis desterradu Ataúru bele hadi’ak sira-nia ekonomia uma-laran.

Hafoin reuniaun ne’e, Prezidente ba Komisaun Instaladora ba Eis Desterradu Ataúru (KIDA) Agostinho Gregório Ramos entrga kedas Proposta ne’e ba Koordenadór Gabinete de Apoio Sociedade Civil (GASC), Filipe da Costa, iha sala reuniaun GASC.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here