Vise-Ministru Interiór, António Armindo. Imajen TATOLI/Egas Cristovão

DILI, 01 setembru 2020 (TATOLI) – Vise Ministru Interiór, António Armindo, hateten  sidadaun hotu- hotu inklui grupu Grupu Rezisténsia Nasionál Defende Justisa no Konstituisaun RDLT  (RNDJK)  bele halo sira-nia asaun pasífiku hasoru Prezidente Repúblika, Francisco Guterres Lú-Olo, maibé tenke kumpre nafatin regra hodi asegura demonstrasaun la’o ho dame.

Notísia Relevante : Jenerál Lere sei lori forsa kaptura Angela Freitas ho António Aitahan Matak

 “Ita fiar manifestasaun ida hanesan ne’e la’ós foin primeira vés maka halo iha Timor-Leste, PNTL iha ona esperiénsia kona-ba oinsá atu asegura seguransa hodi asaun sira ne’e bele la’o ho dame,” hateten António Armindo ba jornalista, hafoin hala’o enkontru ho Komandu PNTL Munisípiu Dili ho estrutura tomak iha salaun enkontru PNTL, Caicoli, Dili.

Governante ne’e, apela  manifestante sira kumpre regra no dixiplina nafatin, tanba Timor-Leste iha hela faze atu implementa Estadu Emerjénsia dalima ne’ebé aprezenta ona ba Prezidente Repúblika, Francisco Guterres Lú Olo.

Iha fatin hanesan, Superintendente Xefe, Henrique da Costa deklara, PNTL Dili kontaktu ona Batallaun Orden Públiku (BOP), Unidade Espesiál Polísia (UEP) hodi ajuda reforsa seguransa ba asaun pasífiku RNDJK durante loron 4 too loron 18 setembru 2020 ne’ebé sei konsentra iha kampu Tasi-Tolu, Dili.

 “Ita prepara seguransa oras 24 nia laran atu haree situasaun sira ne’e,  direitu ba manifestasaun bele halo, maibé husu tenke uza direitu ida uza ho loloos no labele kria fali sitasaun ida ne’ebé inseguru ba públiku,” hateten Henrique da Costa.

Nia dehan, Komandu PNTL sei uza akta akordu manifestasaun ne’ebé RNDJK halo mak mosu problema violénsia no krime ruma PNTL sei ezekuta tuir lei hodi asegura seguransa la’o di’ak.

“Ita sei uza podér bainhira manifestante sira la kumpre regra tuir akta ne’e,” nia apela.

Notísia Relevante : PNTL aseita pedidu RNDJK halo “manifestasaun” hasoru PR Lú Olo

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here