DILI, 01 setembru 2020 (TATOLI)-Bolseiru Timoroan, Leonardo dos Santos, husu ba Governu atu uza rekursu umanu ne’ebé mak antes ne’e Governu investe ona hodi bá estuda iha estranjeiru tanba sira nu’udar patrimoniu Estadu nian.

Nia hato’o kestaun ne’e durante serimonia re-integra bolseiru Timoroan hamutuk ema na’in 26 husi Ministériu Ensinu Superiór Siénsia no Kultura (MESSK) ba Ministériu Agrikultura no Peska (MAP) hodi halo estájiu profesionál tanba ramata ona sira-nia estudu iha área teknolojia rekursu marina, teknolojia peska no tékniku hakiak ikan iha Indonézia.

Notísia Relevante :MESSK re-integra bolseiru 26 ba MAP

Bolseiru hirak ne’e hetan bolsa estudu husi Governu liuhosi Ministériu Agrikultura no Peska no Ministériu Ensinu Superiór Siénsia no Kultura iha tinan 2014 liubá.

“Ami konsidera sai ona patrimoniu Estadu nian, maibé ami mós triste kuandu tinan haat  gasta osan Estadu nian ikusmai Governu la aproveita ami-nia abilidade, koñesimentu, kapasidade sei lori tristeja boot,” dehan nia iha Salaun MAP Comoro, tersa (01/09).

Maibé nia iha esperansa boot ba Governu atu uza rekursu ne’ebé durante ne’e Governu investe atu kontribui ba prosesu dezenvolvimentu nasaun nian.

“Ami iha nafatin korajen katak MAP iha ona planu di’ak mai ami tanba ami sira ne’e durante tinan haat uza duni oportunidade ne’e ho di’ak hodi bele atinje objetivu sira ne’e,” tenik tan.

Jornalista : Tomé Amado

Editór       : Agapito dos Santos 

HAKEREK NO HATÁN

Please enter your comment!
Please enter your name here