Diretór Jerál Autoridade Aduaneira (AA)/Alfándega, José António Fátima Abílio. Imajen Tatoli/Egas Cristovão.

DILI, 01 setembru 2020 (TATOLI)-Foos akizisaun faze dahuluk tonelada 6.000 hosi Vietname ne’ebe atraka iha portu Dili iha loron 12 agostu ho ró MV.MY HUNG, deskarga ona ba armazen Sentru Lojíztika Nasionál (CLN, sigla portugés).

Diretór Jerál Autoridade Aduaneira (AA)/Alfándega, José António Fátima Abílio, hateten importasaun foos entre Governu Timor-Leste no Vietname ne’ebé realiza hosi CLN halo mós koordenasaun ho parte Alfándega.

“Parte alfándega nian, ami konkorda no komesa deskarga ona maibé la hatene tanba saida maka foos balun seidauk hatún, parte ne’e la’ós prosesu ami-nia tanba Alfádega finaliza ona prosesu. Importasaun ne’e uza karta kréditu atu asegura pagamentu tanba Governu uza hela orsamentu doudesimál,” afirma Diretór Járal Alfándega, ba Agência Tatoli iha ninia knaar fatin, Palásiu Governu, tersa ne’e.

Notísia Relevante: Akizisaun foos faze dahuluk tonelada 6.000 atraka iha Portu Dili

Totál foos akizisaun hamutuk tonelada 30.000 ho kustu millaun $15, sei atraka iha Portu Dili dala tolu.

“Ba dahuluk maka deskarga ona no parese faze daruak nian mós to’o ona. Tuir loloos laiha problema maibé tanba antri tuir oráriu ró no iha despaisu ba ró ne’ebé tama uluk tenke deskarga uluk,” nia informa.

Responsável Autoridade Aduaneira ne’e dehan, durante ne’e halo ona koordenasaun di’ak ho parte CLN atu liberta sasán hosi Portu Dili.

“Koordenasaun ho CLN di’ak tebes no ami fó prioridade atu deskarga no pagamentu sei halo dala-ida de’it tanba orsamentu iha no sira asegura hela. Ró tolu ne’e tama no deskarga hotu foos maka foin prosesa pagamentu dala-ida. Bainhira hatún no lori ba armazen, dala ruma iha armazen ema mak la sufisiente atu hatún foos ne’e maibé kestaun Alfándega laiha problema tanba prosesu ne’e ami halo klaru ona,” nia subliña.

José António esplika, prosedimentu ba deskarga sasán iha situasaun emerjénsia ka normál nafatin tenke submete dokumentu hafoin broker ida hahú halo prosesu no lansa informasaun iha sistema hafoin haree ninia prosesu pagamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here