Rosa Garcia no Suzana Cardoso Entrevista ho Lere Anan Timur. Imajen/Espesiál.

Milísia sira bolu, jornalista mós Gerakan Pengacau Kemanan (GPK). Maibé ne’e la sai dezafiu ba ami atu hala’o knaar hodi halo kobertura. Ami kontinua halo kobertura hodi halibur faktu no dadus hodi hakerek notísia ne’ebé balansu (cover both side) hodi haklaken ba komunidade internasional sira liuhosi mída estranjeiru sira.

 DILI, 31 agostu 2020 (TATOLI)—Rasi-lulik Timor-Leste ne’e bele ukun-aan tanba la sees hosi kontribuisaun makaas hosi jornalista timoroan no estranjeiru sira. Iha Konsulta Populár 1999 ne’e, jornalista iha papel ida importante tebes tanba hodi jornalista sira-nia lapijera mak bele hamonu Indonézia liuhosi notísia sira ne’ebé jornalista sira hakerek no haklaken ba rai-rai.

Iha ámbitu komemorasaun Konsulta Populár ba dala-21 (30 agostu 1999-30 agostu 2020) ne’e, jornalista senior Rosa Garacia ne’ebé iha biban ne’eba halo kobertura ba prosesu Konsulta Populár iha Timor-Leste iha tinan 1999 ne’e, haktuir ninia sasin ba Jornalista Agência TATOLI, Cancio Ximenes, liuhosi entrevista, segunda (31 agostu 2020).

Reformasaun iha Indonézia

Hafoin rezime Soeharto monu iha 1998 liuhosi reformasaun, Estadu Indonézia fó sai dezisaun katak rai Timor Timur sai rai ida ne’eb’e nakloke ba mundu ho naran “Timor Timur Terbuka” atu ema hosi nasaun seluk bele tama mai Timor-Timur ho livre. Iha momentu ne’e, Jornalista estranjeiru barak mós tama mai Timor Timur hodi halo kobertura ba situsaun polítika rai laran liuliu oinsá povu Timor Timur nia luta ba ukun trasik aan.

Iha momentu ne’e, ha’u sai uluk korespondente ba Swedia TV. Bainhira Crew TV Swedia ba STT buka tradutór lian Tetun, Bahasa Indoesia (maláiu) no ba lian Inglés. Xefe Koran Harian Suara Timor-Timur (STT), Salvador J. Ximenes Soares, obriga ha’u sai korespondente ba mídia hodi servisu hamutuk ho jornalista sira-ne’e. Afinál, ha’u ladún hatene Lian Inglés. Maibe, maun Salvador dehan ba ha’u, “Ó ba de’it. Ha’u fiar ó bele.”

Maun Sala (baibain ami bolu) hanesan na’in ba Koran Suara Timor-Timur (STT), nia fó livre ba ami sai korespondente ba mídia estranjeiru hodi fasilita liután hodi hato’o notísia ne’ebé labele publika iha STT, ita bele publika mós iha mídia liur.

Tanba, imi hatene situsaun momentu ne’e bainhira Koran Suara Timor-Timur (STT) hatun notísia ruma ne’ebé mak kontra okupasaun Indonésia, militár sira mai ameasa, milisia mai ataka, ami be kiik bele halai lakon maibe ami-nia xefe hanesan Redaktur Pelaksana (Redpel), Maun Aderito Hugo da Costa (atual depuatdu CNRT) no maun Salvador ema bolu hodi investiga no fó presaun. Ha’u momentu ne’e la’ós sai tradutór maibe mós sai korespondente ba Kyodo News (Japaun).

Defisil tanba ita inimigu nia leet. Satán, ita jornalista no loro-loron kolega jornalista sira hosi Televisi Republik Indonesia (TVRI) foka hela de’it ita-nia oin sai iha televizaun, milísi sira koñese ita-nia oin. Milísia sira bolu, jornalista mós Gerakan Pengacau Kemanan (GPK). Maibé ne’e la sai dezafiu ba ami atu hala’o knaar hodi halo kobertura. Ami kontinua halo kobertura hodi halibur faktus no dadus hodi hakerek notísia ne’ebé balansu (cover both side) hodi haklaken ba komunidade internasional sira liuhosi mída estranjeiru sira.

Ha’u mós iha 1996, hamutuk ho Isabel Ferreira, ami loke ONG ida naran Kontras. Ha’u-nia pozisaun iha ne’ebá hanesan fundadora no servisu liga ba mídi. Iha fundasaun, ami ajuda proteje vitima sira, buka dadus kona-ba vitima ne’ebé lakon. Momentu ne’e, ha’u mós publika kona-ba situsaun balun ne’ebé viola ireitus uamnus liuhosi Suara Timor Timur (STT). Ami mós ba hasoru FALINTIL hodi entrevsita oinsá pozisaun sira nian kona-ba auto-deterninasaun, nune’e mós ba entervista Eurico Guterres, autoridade militár no polisia, inklui lideransa pro-otonomi no pro-kemerdekaan.

Momentu ne’e, maski ha’u ladún hatene Inglés maibé berani hahú hatene ko’alia liafuan “Yes!” no “No!”, ha’u konsege servisu ho mídia boot sira iha mundu hanesan CNN, BBC, ABC, NHK, Swedia TV, Kyodo, Reuters, AFP, no mídia lubuk ida hosi Japaun.

Ami tuba iha Sidade Dili ba vizita FALINTIL sira no vizita fatin konflitu hodi buka dadus halo notísia. Atu hateten, hahú hosi 1995 to’o 1999, ha’u fó aan tomak ba ha’u-nia profisaun nu’udar jornalista. Ha’u ko’alia beibeik ba ha’u-nia família sira katak, “Lalika hanoin ha’u. Tanba, hanesan jornalista, ha’u ne’e hanesan buat ida karik ha’u-nia bikan doku ona. Loron ruma mak ha’u fila lori ha’u-nia isin-lolon tomak hasoru imi, signifika katak ne’e grasa Maromak nian”.

Iha loron Konsulta Popular, 30 agostu 1999, ha’u ba vota iha Manatuto tanba momentu ne’e Jamshed Marker ba vizita Manatuto kona-ba realizasaun peosesu Konsulta Populár. Entaun, jornalista estranjeiru sira hosi rai liur no inklui ha’u, konsentra hotu iha Manatuto. Ha’u tenke vota iha Manatuto hafoin fila-fali mai Dili iha lorokraik.

Atu hateten, hanesan timoroan, ha’u envolve iha luta ba libertasaun nasional ne’e liuhosi maneira oinsá ha’u hatutan ema kbiit laek sira-nia lian liuhosi ha’u-nia obra hakerek. Dalaruma, ha’u labele hato’o liu hosi jornál nasionál (lokal), dalabarak ha’u hato’o informasaun liuliu povu Timor-Leste nia luta ba ukun rasik aan nakait ho violasaun direitus umanus ne’ebé akontese iha Timor Timur liuhosi mídia internasionál.

Obstakulu

Obstaklu boot ida mai ha’u mak aleinde jornalista hanesan profisaun ida-ne’ebé ha’u hili iha kode etika mak regula ha’u liuliu ezije ha’u atu sai ema “Profísionál” no “Independente” maibé dalawa’in ha’u kontra. Tanba, ha’u nu’udar ema Timor no timoroan no ha’u iha nasionalizmu makaas, ne’ebé sente rai Timor-Leste nia terus, loro-loron hasoru direta povu sira ne’ebe halerik ba terus, hamlaha no violasaun direitu umanu be oin-oin.

Dalaruma, sira-nia halerik obriga ha’u aumenta informasaun balun liuhosi ha’u no hakerek hodi fó sai ba komunidade internasionál sira iha rai liur. Katak, povu nia hakarak hanesan saida mak ha’u hakerek dalaruma fonte ladún hatene ko’alia no tauk, ha’u inventa ho ha’u-nia hanoin bazea ba maioria nia hanoin. Ha’u iha fiar ida iha momentu ne’e, katak bainhira ita bosok ba buat di’ak ne’e la sala maibé “bosok” ida-ne’e hanesan dezafiu ida.

Rosa Garcia, Santina de Araújo, no Suzana Cardoso.

Dezafiu ida seluk, ita-nia inimigu sira la sportif. Sira lori forsa hodi ameasa ami jornalista, tanba ne’e dalaruma halo ami tauk. Lakon tiha loron balun, hafoin mosu fila-fali hodi halo kobertura no hakerek notísia. Satán, ami na’in-tolu (3) (Suzana Cardoso, Santina de Araújo, no ha’u) momentu ne’e mesak “feto” no sei klosan hotu, milísia sira sempre terror ami hosi telfone ho liafuan mesak aat tantann de’it Ida-ne’e, halo ami mós tauk no kuidadu tebes bainhira hala’o kobertura ruma iha terrenu.

Dezafiu seluk mak auatoridade militár (ABRI=Angkatan Bersenjata Republik Indonesia) no polísia (POLRI=Polisi Republik Indonesia) sira sosa jornalista sira ho osan. Ha’u komu ha’u-nia beat iha POLDA (Polisi Daerah), ha’u sempre jatah hetan envelope ne’ebé iha laran ne’e iha osan Rp.100 (agora $10) ho gratuita. Ha’u ko’alia ho kolega jornalista sira seluk ne’e ha’u dehan, “Osan ne’e, ha’u simu de’it. Keta halo ita la simu mak ema sira ne’e bele deskonfia ha’u. Di’ak liu, iha estratejia luta, ita kuandu tama iha inimigu nia klaran, ita hatene tau aan. Naran, labele tama no sai hpdo sai parte (bagian) ida ho sira. Entaun, osan ne’e ha’u foti de’it. Tanba, ha’u iha hanoin ida, osan ne’e bele ajuda ita-nia maluk balun ne’ebé presiza. Tanba situasaun mak obriga maibé ita nafatin fó sai faktu ne’ebé loos no momoos lihosi notísia ne’ebé ha’u hakerek”.

Tanba ne’e, bainhira gabungan militer (ABRI no POLRI-Brimob) sira oho kolega jornalista timoroan ida, Bernardino Gueterres, iha Kuluhun (Dili), ami fó sai loloos notísia katak BRIMOB mak oho Bernardino Guterres. No, iha tempu ne’ebá ne’e, ha’u duni mak kontaktu ba KAPOLDA (kepala polisi daerah) husu atu Bernardino Guterres nia mate-isin labele lori lakon, husik entrega ba família sira haloot tir nia dalan. Ha’u informa ba KAPOLDA katak BRIMOB mak oho ha’u-nia kolega eskola no jornalista Bernardino “Bedinho” Guterres.

Momentu ne’e, ha’u haree matebian Bernardino “Bedinho” Guterres, BRIMOB sira tiru mate no monu kedas iha ha’u-nia oin. Ha’u hakfodak bainhira ha’u rekoñese katak ne’e Bernardino. Ha’u tuur iha estrada klaran tanis no lelir. Iha situasaun hanesan ne’e, ha’u-nia kolega jornalista internasional sira be halo kobertura hamutuk iha fatin refere, sira hotu halai mai hamaus ha’u atu labele tanis. Iha biban ne’e, ha’u labele kontrola no domina ha’u-nia aan, ha’u konsege istória malu ho membru BRIMOB sira. Tanba, sira-nia maneira oho jornalista Bernardino “Bedinho” Guterres ne’e, provoka ha’u-nia tensaun no halo ha’u brani no la tauk mate.

04 Setembru 1999

Iha loron 04 Sepembru 1999, ha’u ho kolega jornalista Suzana Cardoso ba halo kobertura iha Hotel Mahkota (agora Hotel Timor) tanba rezultadu Konsulta Populár (referendu) sei fó sai iha iha fatin ne’e ho ofisialmente ba públiku liuhosi konferénsia imprensa ba jornalista sira. Ami na’in-rua (2) ho kolega jornalista internasionál sira balun–kolega Santina de Araújo halai uluk ona ba Jakarta-Indonesia tanba nia patraun hosi Jornál Maininchi Shimbun (Japaun) mak selu nia viajen.

Rosa Garcia no Suzana Cardoso.

Hafoin rona rezultadu katak maiória pobu Timor-Leste hili ukun aan, ami hotu kontente, hakuak malu, hodi espresa sentiment haksolok ne’e hodi tebe dahur. Hafoin ne’e, ha’u dehan ba Suzana Cardoso para ami rua la’o haleu Dili hodi halo observasaun ba situsaun. Ha’u, momentu ne’e halo ona idade 20-liu. Sei joven no raan manas. Ha’u kurioza no la deskonfia katak militár no milísia sira atu ameasa ami.

Ha’u iha hanoin ida de’it. Katak, ha’u ukun aan ona. Signifika ha’u manan ona. Ne’e ha’u-nia rain. Ne’e ha’u-nia soberania. Entaun, hau ho Suzana Cardos ho nia motor bebek ida ami na’in-rua (2) la’o haleu sidade Dili. Ami rua ba uluk halo observasaun iha markas milísia sira-nian, Eurico Guterres, nia markas (agora Hotel Plaza). Hosi lampu merah Burger King hateke ba, kamioneta (truck) 10 resin para iha Eurico Guterres nia uma oin. Ha’u dehan sira atu halai. Entaun, ami rua lori motor tun ba Lecidere, iha ne’ebé, ema nakonu liuliu maioria ha’u-nia família no família balu hosi bairu seluk mós nakonu ona iha Amo Belo nia rezidénsia.

Ha’u dehan, nusa ema halai hotu. Milísi mós halai. Pro-independénsia sira mós halai. Kolega Suzana Cardoso obriga ha’u hodi dehan; Rosa, lori ó-nia dokumentu importante sira-ne’e hamutuk ho ó. Tanba Bidau ne’e ha’u-nia bairru. Ami rua kebetulan iha ne’ebá, nia haruka ha’u foti dokumentu sira ne’e. Ha’u dehan, tanbasá tenke halai? Se ita manan ona.

Maibé ha’u-nia kolega Atsabe oan ne’e ulun to’os no obriga ha’u tenke to’o uma hodi foti dokumentu. Entaun, ha’u só foti mak ijasah (diploma), sertidaun, disionáriu Indo-Inglés no Inglés-Indo, no no ha’u-nia estátua Nain Feto do Rosario de Fatima ne’ebé ha’u-mia maun Agostinho lori hosi Portugal fó ba ha’u.

Entaun, sasán sira ne’e ha’u tau iha ha’u-nia musila hodi tara iha kotuk. Ami rua kontinua sae motor la’o tesik ba Santa Cruz hodi observa situsaun. To’o besik rate iha área Kintal Boot nian, karreta KIJANG ida nakonu ho milísi hasoru ami rua. Sira mós tauk ami. Ami mos tauk sira. Maibé tanba sira ema barak entaun sira ameasa, tolok no tiru ami fizika no fatuk kona Suzana nia liman no kona ha’u-nia oklu. Kolega Suzana hakfodak no ami rua mós deside halai ho motor.

Ami konsege sai hodi halai ba Delta nian no ami ba subar iha área jornalista internasional sira-nia hela fatin. Entaun, momentu ami konta kona-ba situsaun ne’e ba joranlista estranjeiru sira, jornalista Japaun sira-ne’e tauk no deside lori ami halai no sai ba Jakarta-Indonézia. Entaun, Fuji TV mak aluga aviaun ba ha’u no ha’u-nia kolega João Barreto no Suzana Cardoso ne’e, sira-nia patraun hosi Nikkei Shimbun mak sosa tikete.

22 Setembru 1999 Fila-Mai Timor

Hanesan ha’u hateten iha leten, ha’u jornalista Timor no feto Timor primeiru ne’ebé mak fila fali mai Timor iha loron 22 fulan setembru 1999. Razaun ha’u fila fali tanba ha’u iha kuriozidade hakarak hatene saida mak mosu iha Timor hafoin konsulta popular. Razaun segundu, mak ha’u nia inan ne’ebé hahoris ha’u la halai ba foho leten maibé subar hela iha Dili hodi tau matan ba ha’u-nia tiun ne’ebé moras hela.

Ha’u-nia mama hela iha uma Colmera besik área uluk SGI nian, Kompleks BKKBN. Ema tauk atu ba book sira. Loron ha’u-nia mama ba hein tiu. Kalan ha’u-nia mama ba toba iha portu. Bainhira ha’u mai ho kolega Swedia hotel laiha. Fatin hela laiha. Ha’u deside ami ba hela iha uma. Tanba ami hola jerador entaun Ami ba hela iha Uma Colmera. Iha momentu ne’e Tentara Indonezia mós sei iha hela Dili no polísia balun. Maibé ami informa ba INTERFET hodi kalan bele kontrola ami-nia uma.

Hahú hosi ne’e ami halo planu kobertura kona-ba situsuan hafoin referendu no ami tenke entrevista portavóz pro-kemerdekaan (CNRT), David Dias Ximenes “Mandati” no Leandro Isaac. Komu ami kontaktu dehan sira iha Dare entaun Ami aluga karreta (truck) ba Dare hodi entervista ho David Mandati no Leandro Isaac no komunidade sira iha Dare.

To’o iha Dare ha’u hasoru kolega sira liuliu Sra. Isabel Ferreira. Ha’u husu nia atu ba hela hamutuk ho ami iha Colmera tanba família halai fahe malu no tanba kebetulan ha’u-nia mama iha, entaun bele tau matan mai ami hotu.

Iha ne’e mak ami hahú loke Comissão Direitus Humanus Timor-Leste CDHTL), ne’ebé ha’u mós servisu iha organizasaun ne’e no liuhosi apoiu hosi UNESCO, Timor Aid, ha’u mós publika ha’u-nia bulletin ho naran “Loron Foun Sa’e”. Ha’u tau notísia hosi ONU ba iha surat tahan A4 ne’e hodi fahe ba komunidade sira ne’ebé refujia hela iha tasi ibun Lecidere.

Bainhira ha’u ho Isabel Fereira ba hasoru USAID atu fó ajuda ba CDHTL, ha’u mós fó introdus ha’u-nia aan ba sira hanesan jornalista. Karik, sira mós bele apoiu loke jornál no sira dehan bele apoiu kuandu iha ekipa forte. Entaun ha’u komunika kolega sira liuliu maun Otelio Ote no maun José Ximenes ne’ebé hela metin iha Timor no sira la halai ba rai liur ho maun Hugo da Costa no sira seluk. Katak, ita mai hamutuk loke Jornál tanba iha ema hakarak ajuda.

Komu ha’u jornalista ne’ebé fila uluk mai Timor, ha’u-nia nia notísia sai viral entaun ha’u hetan oportunidade barak hodi ba tuir formasaun sira iha rai liur. Momentu kolega sira mai hotu, ami halo diskusaun deside loke jornál, hafoin kolega balun ba tuir formaaun iha Queensland. Sira fila ho ekipamentu balun ne’ebé ajuda direta hosi katuas Bob Howard, ami hahú publika ami-nia jornál Diáiru Timor Post iha 29 fevereiru 2000, ne’ebé harii hosi ami na’in-14 hodi hili lema “Harii Unidade, Justisa no Demokrasia”.

Ami atu hateten, ami brani loke Jornál ne’e ho de’it ami-nia kompromisiu hakarak kontribui ba dezenvolvimentu hafoin ukun aan no mós ami nia background jornalista no koñesimentu iha kada ami na’in-14 nia área. Hosi ami na’in-14 ne’ebé harii Timor Post ne’e, kuaze maiória jornalista ho feto na’in-tolu (3) no mane na’in-11.

Ba Jornalista Sira

Ha’u atu hateten hanesan ne’e, Timor-Leste to’o bele ukun an tanba la sees hosi kontribuisaun makaas hosi jornalista sira. Jornalista iha papel ida importante tebes. Jornalista nia   lapijera bele hamonu nasaun ida, bele mós dezenvolve nasaun ida ba moris di’ak. Se iha situsaun ida defisil, iha presegisaun, ami lubun konsege ultrapasa no halo duni.

Aleinde matan balun haree ba la hetan, tanbasá mak ukun ne’e defisil loos ba jornalista ida atu hala’o loloos nia papel iha termu de kontrola no kritiku haree sasán sira la’o la loos. Ha’u hatene iha situsaun agora defisil ita hasoru ita-nia aan, ita-nia família. Maibé, ida-ne’e dezafiu ba ema ne’ebé hili profisaun jornalista hodi sai profisionál liután.

Jornalista: Cancio Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here