Concelho Juventude Município Liquiça (CJML), Laurindo de Jesus dos Santos, rejeita informasaun ne’ebé espalla iha rede sosiál atu organiza juventude partisipa demonstrasaun. Imajen/Espesiál.

LIQUIÇÁ, 31 agostu 2020 (TATOLI)—Prezidente Concelho Juventude Município Liquiça (CJML), Laurindo de Jesus dos Santos, rejeita informasaun ne’ebé espalla iha rede sosiál atu organiza juventude partisipa manifestasaun ne’ebé mobiliza hosi Ângela Freitas ho nia grupu.

Prezidente Komisaun Organizadora atuál Prezidente CNJTL Munisípiu Liquiçá, Laurindo dos Santos. Imajen/Evaristo Soares Martins.

Xefe Juventude Munisípiu Liquiça ne’e klarifika informasaun ne’ebé espalla iha públiku no iha mídia sosiál katak Concelho Juventude Município Liquiça mak atu mobiliza juventude iha territóriu nasionál hodi halo manifestasaun ida-ne’ebé organiza no lidera hosi Angela Freitas nu’udar Coordenador Grupo Resistência Nacional Defende Justiça e Constitução RDTL iha loron 04 fulan-setembru hodi hatún Prezidente Repúblika Timor-Leste.

“Informasaun ne’e laloos kona-ba manifestasaun ida-ne’e. Ami hosi Concelho Juventude Munícipio Liquiça nian, lahatene buat ida no ami laiha koñesimentu kona-ba ida ne’e. Ami hosi Concelho Juventude Município Liquiçá deklara katak laiha hanoin no hakarak atu halo manifestasaun ruma,” Prezidente Concelho Juventude Município Liquiça (CJML), Laurindo de Jesus dos Santos informa liuhosi Konferénsia Imprensa, iha  CJML, segunda ne’e.

Xefe Juventude Munisípiu Liquiça konsidera karta ne’e hanesan Surat Kaleng no informasaun falsu, hanesan oras ne’e espalla iha públiku no mídia sosiál.

“Bainhira informasaun ne’e to’o iha autoridade seguransa militár no sivíl nia tilun karik, husu ho favór atu verifika lai ho sekretariadu Concelho Juventude Município Liquiça nian molok fó-sai iha públiku,” Laurindo dos Santos hateten.

Prezidente Concelho Juventude Município Liquiça ne’e lamenta ho informasaun ne’ebé espalla tanba nia parte la hatene. Laurindo de Jesus dos Santos reprezenta juventude munisípiu Liquiçá husu ba autoridade kompetente atu buka-tuir autór ne’ebé espalla surat kaleng refere tanba laiha responsabilidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here