Logotipu CAC.

DILI, 31 agostu 2020 (TATOLI)- Komisaun  Anti-Korrupsaun (CAC) no  Autoridade Munisípiu Dili realiza semináriu ho tópiku “papél lider komunitária ba prevene korrupsaun” ba autoridade lokál no lider komunitária sira liu na’in-200 ne’ebé pertense ba autoridade Munisípiu Dili nian.

Semináriu  ne’e realiza  iha Sentru Formasaun Judisiáriu Caicoli, Dili, ofisiálmente abertura husi Prezidente Autoridade Munisïpiu Dili, Gaspar Soares no partisipa ativa husi lider autoridade lokál no komunitária husi Postu Administrativu lima (5); hanesan Vera Cruz, Na’in Feto, Don Aleixo, Metinaro no Atauro ho suku hamutuk 36.

Semináriu ne’e ho objetivu atu habelar informasaun kona-ba papél CAC nian, nune’e mós aprezenta relatóriu monitorizasaun CAC nian ba subsídiu agregadu familiar, motiva partisipasaun entidade hotu oinsá atu tula kamada ba malu iha luta prevene no kombate korrupsaun iha Timor-Leste.

Rezultadu monitorizasaun ne’e foka ba iha situasaun tolu; dahuluk kona-ba oinsá prosesu pagamentu kumpre regra sira, daruak, kona-ba protokolu distansiamentu sosiál no ikus datoluk, kona-ba risku potensiál sira ba falsifikasaun dadus fixa familiar no pratika di’ak sira.

Komisáriu Komisaun  Anti-Korrupsaun  (CAC), Sergio Hornai iha nia intervensaun lori CAC nia naran espresa laran haksolok no agradesimentu ba partisipasaun másimu lider lokál no lider komunitáriu Munisípiu Dili nian ne’ebé maske iha loron toleránsia do pontu maibé espíritu lideres iha baze nian ho entuziazmu boot mai partisipa ativamente iha semináriu  refere.

Oradór prinsipál na’in-haat  mak hato’o sira nia aprezentasaun durante semináriu hanesan Komisáriu CAC Sergio Hornai, Komisáriu Adjuntu ba Asuntu Prevensaun no Sensibilizasaun Luis de Oliveira Sampaio, Prezidente Autoridade Munisípiu Dili Gaspar Soares no xefe Unidade Estudu Avaliasaun no Risku Cirilo Abi aprezentadór ba relatóriu monitorizasaun CAC nian ba Subsídiu agregadu familiar.

Jornalista   : Nelson de Sousa  

Editór        : Francisco Simões 

HAKEREK NO HATÁN

Please enter your comment!
Please enter your name here