Romo Mangunwijaya.

DILI, 30 agostu 2020 (TATOLI)—Líder Juventude Rezisténsia atuál Prezidente Partidu Demokrátiku (PD), Mariano Assanami Sabino, hateten ativista Yusuf Bilyarta Mangunwijaya koñesidu Romo Mangunwijaya mós kontribui influénsia BJ Habibie hodi fó opsaun ne’ebé povu ba problema Timor nian iha tempu okupasaun Indonézia.

Notísia Relevante: Assanami triste Estadu la rekoñese istória luta iha territóriu Indonézia

Romo Mangunwijaya ne’e moris iha loron 06 maiu 1929 iha Ambarawa, Jawa Tengah, no hakotu ninia peregrinasaun iha mundu iha 10 fevereiru 1999. Matebian ne’e hanesan clero (rohaniwan), pratikante kulturál (budayawan), arkitetu, autór hakerek artigu no ativista.

Assanami dehan, iha tempu Timor-Leste ne’ebá ema ne’ebé fó influénsia ba Prezidente BJ Habibie mak Romangunwijaya.

Eis Koordenadór Prezidium Juventude Loriku Assuwain (PJLA) ne’e dehan, mensajen importante ne’ebé povu Timor-Leste labele haluha tanba Romo Mangunwijaya hakerek karta ida ne’ebé mak públika ikus iha Harian Umum Kompas no mós karta ne’e nia dedika ba Prezidente BJ Habibie.

Romo Mangunwijaya. Imajen/Espesial.

“Romo Mangungwijaya dehan ba BJ Habibie nune’e; Ó-sai prezidente ne’e tanba Soeharto tún. Prezidente ne’e tranzisaun ida-de’it, to’o tempu ida ema bele hili fali o, bele mós hili ema seluk. Tanba ne’e, uza ó-nia tempu tranzisaun ne’e mak ó bele hamoos matan-been povu Timor-Leste nian no ó bele ajuda para fó referendu ba Timor-Leste,” Eis Koordenadór Prezidium Juventude Loriku Assuwain (PJLA) ne’e informa ba Agência TATOLI, iha ámbitu komemorasaun loron Konsulta Populár bad ala-21 (30 Agostu 1999-30 agostu 2020) iha sede PD, Colmera, Dili, sesta (28 agostu 2020).

Nune’e mós, nia dehan, Romo Mangunwijaya informa ba Prezidente BJ Habibie katak bainhira fó duni opsaun ba povu Timor-Leste BJ Habibie nia naran ne’e Timoroan sira sei hakerek ho tinta osan-mean iha sira ida-idak nia fuan laran.

“Ohin loron ita haree ponte ida tau naran BJ Habibie maibé ema barak la hatene katak sé mak iha nia kotuk. Ema ida iha kotuk ne’e mak Romo Manngunwijaya. Romo ne’e, romo ida-ne’ebé mak fó-aan ba luta Timor-Leste nian, ne’ebé fó influénsia ba padre sira hodi kontinua diskute problema Timor nian,” dehan Eis Lideransa Sentrál Ikatan Mahasiswa Pelajar Pemuda Timor Timur (IMPPETU) ne’e.

Eis Vise-Sekretáriu Jerál RENETIL ne’e hateten, Romo Mangunwijaya ne’e influénsia Prezidente BJ Habibie tanba sira-nia na’in-rua ramata estudu iha rai Alemaña.

Jornalista: Evaristo Soares Martins

Editór: Cancio Ximenes

 

HAKEREK NO HATÁN

Please enter your comment!
Please enter your name here