Ministru Transporte no Komunikasaun, José Agustinho da Silva. Imajen Tatoli/Egas Cristovão

DILI, 30 agostu 2020 (TATOLI)-Governu liuhosi Ministériu Transporte no Komunikasaun (MTK) hahú analiza tékniku atu oferese internet gratuita ba estudante nível superiór no sekundária sira hodi fasilita prosesu aprendizajen.

“Internet gratuita ba estudante sira ne’ebé ministériu planea, iha ona kabimentu orsamentu hosi fundu COVID-19 ne’ebé daudaun iha hela faze analiza tékniku atu tama ba faze implementasaun,” tenik Ministru José Agostinho da silva, ba Agência Tatoli, foin lalais ne’e iha Palásiu Governu.

Programa ne’e tama iha pakote sosiu-ekonómiku hodi hatan ba efeitu negativu surtu COVID-19, ne’ebé Governu liuhosi desizaun Konsellu Ministru aprova ona iha 20 abríl.

Notísia Relevante: Governu Aprova Planu Sosio-Ekonómiku Hatan ba Efeitu Negativu Pandemia COVID-19

Governante ne’e dehan, MTK hamutuk ho Autoridade Nasionál Komunikasaun (ANC, sigla protugés) téknikamente preparadu ona ba faze implementasaun.

“Prosesu ne’e iha kabementu orsamentu  kuaze $600.000 no agora tama ona iha faze tékniku ninian, agora presiza aselera oituan prosesu implementasaun. Maibé ami sei diskute lai mekanizmu  sistema implementasaun,”  nia akresenta.

Kona-ba totál benefisiáriu, tuir Ministru sei iha koodenasaun ho Ministériu Edukasaun, Juventude no Desportu atubele rekolla benefisiáriu sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here