Mariano Assanami Sabino. Imajen/Antonio Goncalves

DILI, 30 agostu 2020 (TATOLI)—Eis Koordenadór Mobilizasaun Polítika Conselho Nacional da Resistência Timorense (CNRT) iha 1999 atuál Prezidente Partidu Demokrátiku (PD), Mariano Assanami Sabino, husu Estadu tau-aas sakrifísiu hotu-hotu iha prosesu luta ba libertasaun nasionál nune’e konsolida estadu ne’e bá-oin.

“Ho loron Konsulta Populár ba dala-21 (30 Agostu 1999-30 agostu 2020) ne’e, ita-nia luta ita tenke relembra no tenke konsolida. Ita tenke tau aas sakrifísiu hotu-hotu iha prosesu luta ba libertasaun nasionál maibé ita tenke hakat ba-oin hodi suku fila-fali Timorense para ema hotu orgullu. Labele iha polítika kuandu ita hamutuk ita gava-malu hodi konta mak ida-nia luta, maibé ita foin sees-malu ita konta dehan nia traisaun. Funu ne’e iha eroi no traisaun maibé Timor-Leste la hili para sai eroi, la hili para sai traisaun,” Eis Koordenadór Prezidium Juventude Loriku Assuwain (PJLA) ne’e informa ba Agência TATOLI, iha ámbitu komemorasaun loron Konsulta Populár ba dala-21 (30 Agostu 1999-30 agostu 2020) iha sede PD, Colmera, Dili, sesta (28 agostu 2020). 

Eis Vise-Sekretáriu Jerál Rezisténsia Nasionál Estudantes Timor-Leste (RENETIL) ne’e fó hanoin, iha 1975 timoroan sira fahe-malu, iha 1999 fahe-malu, 2006 mós sei fahe-malu, tanba ne’e tenke konsolida kultura no rekonsiliasaun.

“Tanba ne’e ita tenke konsolida kultura, rekonsiliasaun ne’e tenke hametin liután ita-nia hún ida, abut ida, povu ida no rai Timor ida de’it, harii Timor foun ba timoroan tomak ne’ebé dignu no sai númeru dahuluk,” Eis Lideransa Sentrál Ikatan Mahasiswa Pelajar Pemuda Timor Timur (IMPPETU) ne’e hateten.

Nia hateten, Timor-Leste komunga prinsípiu hodi hahú rekonsiliasaun hodi suku fila-fali Timorense hodi ba-oin, luta ba Timor ida forte, Timor ida ukun rasik-aan, Timor ida-ne’ebé ke livre tanba liberdade no direitu umanu ne’e mak konteúdu luta, justisa sosiál, igualdade ba ema hotu-hotu.

“Ne’e maka ita uza liafuan Maubere. Liafuan Maubere ne’e markasaun ida-ne’ebé maka kolonialista fó para la dignifika ita ema, la temi nia naran no bolu de’it Maubere. Ikus ita uza hodi dignifika fali Maubere ne’e katak nia hamriik iha nia ain-leten, ninia rai-leten, politikamente soberanu, ekonomikamente iha ninia ain-leten no iha identidade rasik,” Eis Vise-Sekretáriu Jerál RENETIL ne’e fó hanoin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here