Primeiru-Ministru, Taur Matan Ruak. Imajen Tatoli/Egas Cristovão

DILI, 28 agostu 2020 (TATOLI)-Primeiru Ministru (PM), Taur Matan Ruak, saúda povu Timor-Leste iha ámbitu komemorasaun loron Konsulta Populár (30 agostu 1999-30 agostu 2020).

“Ha’u hakarak saúda populasaun tomak iha Timor-Leste tanba loron 30 agostu ne’e ita komemora loron Konsulta Populár ka Referendu nian ba dala-21, ita hotu iha ne’e atu halo reflesaun hodi relembra iha momentu ne’ebá,” dehan PM Taur iha diskursu ámbitu seremónia pose ba Komisáriu Komisaun Funsaun Públika (CFP,sigla portugés), iha Palásiu Governu, sesta ne’e.

Xefe Governu mós husu sidadaun hotu atu hanoin hikas iha tinan 21 liubá, tanba situasaun defísil no povu hasoru terus no susar oioin, maibé nafatin fó kontribuisaun liuhosi votu determinasaun hodi hetan independénsia.

“Ita espera katak iha tempu oin mai, ita hotu kontinua nafatin fó kontribuisaun atu nasaun bele la’o nafatin ba oin iha dezenvolvimentu ekonómiku, seguransa no estabilidade, liuliu bein estár ba sidadaun, tanba Governu nia atensaun ka foku tomak maka ba sidadaun,” PM subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here