Primeiru-Ministru, Taur Matan Ruak, fó posse ba Komisáriu CFP, Fausto da Silva ‘Liurai Tasi’, iha Palásiu Governu. sexta (28/08). Imajen Tatoli/Egas Cristovão

DILI, 28 agostu 2020 (TATOLI)-Primeiru-Ministru (PM), Taur Matan Rauk, husu ba Komisaun Funsaun Públika (CFP, sigla portugés) atu kontinua fó kontribuisaun ba polítika VIII Governu konstitusionál, hodi halo dezenvolvimentu administrasaun públika hodi serbisu ho efisiénsia no efikásia atu serví povu Timor-Leste.

Xefe Governu lia hirak ne’e iha ámbitu pose ba Komisáriu CFP, Fausto da Silva ‘Liurai Tasi’, ne’ebé hetan nomeasaun hosi Parlamentu Nasionál (PN).

“Ha’u  hakarak parabeniza komisáriu ne’ebé toma pose no reintera ha’u-nia apoia tomak katak komisáriu komisaun funsaun Públika agora kompletu atubele fó kontribuisaun boot ba dezenvolvimentu administrasaun públika iha ita-nia rai,” tenik PM  Taur  liuhosi  diskursu iha seremónia pose ba komisáriu CFP, iha Palásiu Governu, sesta ne’e.

Primeiru-Ministru, Taur Matan Ruak. Imajen Tatoli/Egas Cristovão

Xefe Governu nota katak durante tinan-11, CFP iha papél importante ba funsionalizmu públiku iha nasaun, buat barak mak konsege halo ona, maski presiza halo tan buat barak atu funsionamentu administrasuan públika ne’ebé kompetente no fokalizadu ba bein estár no prestasaun serví sidadaun sira.

“Avalisaun ne’e naturalmente ita-nia povu mak sei halo, saida mak ita halo di’ak no saida mak ita halo aat, sira kada tinan-lima iha eleisaun atu avalia ba dezempeñu no kontribuisaun inklui didikasaun Governu, liuhosi Governu sira seluk,” PM Taur akresenta.

Maibé, eis Prezidente Repúblika ne’e rekoñese katak dezafíu sei boot tebes tanba tranzita hosi Governu ida ba Governu seluk hanesan reforma administrasaun públika.

“Ha’u iha esperansa no konfiasan ba Prezidente no Komisáriu CFP, tanba sira sei asume papél importante atu kontribui iha aspeitu ida liga sistema funsionamentu no administrasaun públiku,” Xefe Governu subliña.

Xefe Ezekutivu ne’e dehan, hafoin kompleta ekipa CFP, konta ho apoia Governu nia liuliu Primeiru-Ministru, hodi hakbiit no fó kontibuisaun ba reforma sira ne’ebé Governu atu halo.

Iha biban hanesan, Komisáriu CFP emposadu, Fausto da Silva ‘Liurai Tasi’, hato’o  agradesementu ba konfiasa ne’ebé PN no PM fó atu sai komisáriu CFP ba mandatu tinan-lima.

Komisáriu CFP emposadu, Fausto da Silva ‘Liurai Tasi’. Imajen Tatoli/Egas Cristovão

“Ba toma pose ne’e, Komisaun Funsaun Públika iha ona forsa kompletu ne’ebé Komisáriu na’in-tolu ne’ebé indika hosi Governu inklui Prezidente CFP no na’in rua seluk indika husi Parlamentu Nasionál. Ho onra boot ida mai ha’u atubele kontinua kontribui ba serbisu iha komisaun ne’e atu serví povu no nasaun,” Komisáriu ne’e agradese.

Nune’e, nia kompromete atu kumpre papél ne’ebé determina ona hosi Governu no Parlamentu, hanesan órgaun ne’ebé polítikamente imparsiál ho padraun aas atu presta serbisu ba Estadu no povu Timor-Leste.

Seremónia ne’e partisipa hosi Ministru Asuntu Parlamentár no Komunikasaun Sosiál Francisco Jerónimo, Ministru Administrasaun Estatál Miguel pereira de Carvalho, Xefe Gabinete Primeiru Ministru Azevedo Marçal, Padre Domingos Maubere, Prezidente CFP Faustino Cardoso, Komisáriu CFP no konvidadu sira seluk.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here