Karteira dijitál T.PAY. Imajen/Telkomcel

DILI, 28 agostu 2020 (TATOLI)-Operadór telekomunikasaun, Telkomcel lansa sistema inovativu ho sistema pagamentu dijitál via online liuhosi karteira dijitál T.PAY hodi moderniza pagamentu ba servisu publiku.

Jestór Dijitalizasaun Telkomcel, Cesaltina Janet da Rosa Magno, hateten objetivu lansamentu pagamentu eletróniku ne’e atu konsensializa públiku atubele abitua ho sistema pagamentu dijitál bainhira halo transasaun ba servisu públiku ho lalais liu via online, atu nune’e la presiza forma.

“Telkomsel mai ho misaun King of Digital, tanba ne’e liuhosi digitál inovativu ne’ebé daudaun introdús, bele suporta komunidade halo pagamentu via online ho karteira eletrónika ne’ebé ita bolu T.PAY, ho nune’e bele ajuda públiku ho di’ak liu kona-ba kestaun antendimentu públiku sira,” tenik Cesaltina Janet, hafoin seremónia lansamentu, iha Timor Plaza, sesta ne’e.

Tuir Jerente ne’e, dijitál inovativu ho modelu karteira elektróniku ne’e bele hafásil atividade utente sira.

“Karteira eletróniku atubele hamenus ona osan cash no hamenus risku hanesan agora daudaun sirkula osan falsu no ita la presiza hanoin barak enkuantu ita haluha karteira, tanba ita presiza loos de’it maka karteira eletrónika,” nia akresenta.

Hafoin lansamentu, sei halo introdusaun kartaun eletrónika ne’e liuhosi sosializasaun ba komunidade nune’e bele informadu ho di’ak, maski tuir nia sistema ne’e difísil atu halo sosializasaun maibé parte Telkomcel sei esforsu.

“Ami atu hatudu katak benefísiu hosi karteira eletrónika. Bainhira pulsa EDTL karik hotu iha kalan boot, presiza hein to’o dadersan maka bele hola fali. Entaun ami hakarak ho karteira eletróniku ne’e bele hafasil kliente, tanba ne’e ami sei serbisu ho EDTL no Governu atubele uza sistema ne’e ho di’ak,” nia esplika.

Esforsu seluk ne’ebé maka Telkomcel sei halo maka hakarak redús ema halo fila iha banku.

“Ita haree ema sei halo antrian naruk bainhira atu tranfere osan ba rai-li’ur ka ba simu osan, nune’e ba oin ami ho sistema dijitalizaun ne’e, ho rede ne’ebé maka Telkomcel iha daudaun hosi aldeia to’o munisípiu hotu, ami bele tranforma no konstrui rede hodi halo transasaun finanseiru ho lalais,” Jestór ne’e realsa.

Responsável ne’e dehan, ba oin operadór telekomunikasaun ne’e sei hamosu tan sistema dijitalizaun seluk, nu’udar xave ba ema bele selu iha fatin ne’ebé de’it liuhosi sisitema dijitál.

Tanba ne’e, Telkomcel sei haree posibilidade atu kolabora hamutuk Governu, nune’e iha pagamentu ne’ebé liga ba Banku Sentrál, Ministériu Finansa no instituisaun Estadu seluk bele uza sistema pagamentu elektróniku.

“Saida de’it maka sei selu ho manuál, ita bele selu hosi eletróniku ona, hanesan daudaun atu selu impostu ba Ministériu Finansa ne’ebé uza ona sistema sitgas maibé nafatin ba selu iha banku. Tanba ne’e ami hakarak ita integra hotu iha sistema eletróniku ne’e atubele hamenus osan cash,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here