Evidensia droga ne'ebé Servisu Alfándega Atambua rekolla husi suspeitu kazál timoroan. Imajen/Dok.Polísia Atambua

DILI, 28 agostu 2020 (TATOLI)-Tribunál Distritál Dili (TDD) sei halo apresiasaun ba rekerimentu husi Ministériu Públiku, relasiona ho relatóriu laboratóriu ba teste matéria  droga ho tipu Pill Ecstasy  husi Badan Narkótika  Nasional (BNN)-Indonézia.

Notísia Relevante : Kazu droga, MP alega pena prizaun tinan-15 ba arguidu JGB

Kazu ne’e envolve arguidu ho inisiál JGB  antes ne’e haruka kondenadu  kazál Timoroan lori  sai husi Territóriu Timor-Leste liuhusi fronteira terrestre  Motain-Indonézia.

Tuir informasaun ne’ebé sita husi prokuradór titular ba kazu ne’e katak, tuir loloos, ohin, ho rekerimentu MP nian  iha audiénsia julgamentu ne’e parte Ministériu Públiku atu halo re-alegasaun foun, maibé juis koletivu la prienxe tanba sei feria judisiáriu nune’e la konsege halo apresiasaun hodi halo deliberasaun .

“Razaun tribunál adia  julgamentu  ne’e tanba tribunál sei halo apresiasaun ba relatóriu husi BNN ne’ebé antes  ne’e parte Tribunál husu atu aprezenta husi MP kona-ba  autos ne’e,” informa  prokuradór  Luis Hernánio Rangel iha TDD.

Tuir nia razaun MP husu halo re-alegasaun, alega de’it   ba faktu balun husi relatóriu BNN nian. Tanba ne’e, tribunál deside adia fila-fali julgamentu ne’e  ba iha loron 31 agostu, tinan ne’e, iha tuku 15:00 otl.

Iha loron 4 agostu 2020, Ministéiru Públiku (MP) liuhusi Prokudór titular  Luis Hernánio Rangel iha nia alegasaun husu ba Tribunál Distritál Dili (TDD) atu aplika pena prizaun efetivu tinan-15 ba arguidu JGB ne’ebé deskonfia komete krime prátika tráfiku droga no atividade ilísitu ne’ebé antes ne’e haruka kazál timoroan lori Pill  Ecstasy sai husi territóriu Timor-Leste liuhusi Motain-Indonézia iha 2019.

Liu hosi audiénsia julgamentu ne’ebé prezide hosi juis koletivu Julmira Auxiladora, João Ribeiro, Argentino Nunes ne’e, MP husu atu aplika pena ne’e tanba iha produsaun prova no aktu maske  arguidu ho hili dalan nonook la ko’alia iha julgamentu sira liubá, so ko’alia de’it iha julgamentu primeiru interrogatóriu no rona mós parte sasin sira to’o entendimentu MP nian prienxe krime tanba simu duni sasán husi   Afrikanu ida ho inisiál VCO     depois haruka fila-fali ba Indonézia.

Notísia Relevante : TDD rona sasin ba kazu droga iha relasaun ho kondenadu kazál timoroan

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here