DILI, 28 agostu 2020 (TATOLI)-Iha ámbitu selebrasaun Aniversáriu 21 Loron Konsulta Populár (30 agostu 1999-30 agostu 2020) ne’ebé tinan ne’e monu iha domingu, maka Governu deside fó toleránsia pontu iha loron tuirmai.
“Governu deside fó toleránsia pontu iha segunda (31/08), ba funsionáriu hotu, ajente ministériu no servisu dependente, hanesan institutu no organizmu integradu iha administrasaun indireta Estadu, atu permite partisipasaun iha selebrasaun,” refere nota imprensa hosi ezekutivu ne’ebé Agência Tatoli asesu, sesta ne’e.
Desizaun ne’e bazeia ba lei númeru 10/2005, 10 agostu, ne’ebé determina loron feriadu nasionál sira, loron ofisiál komemorativa no regra toleránsia pontu.
“Governu apela ba populasaun atu selebra loron importante ne’e iha ita-nia istória, hanesan povu no nasaun, iha família no komunidade, fó onra ba korajen no reziliénsia ba povu no nasaun, ba vontade atu hetan independénsia,” nota ne’e subliña.
Jornalista: Natalino Costa
Editora: Julia Chatarina
