Autór MARKUS no jornalista senior, Cesar MONIZ Mali. Imajen/Yukichika Murayama.

Bainhira ha’u aseita no deside atu simu sena (adegan) hanesan MARKUS, ha’u esforsu-aan atu realiza duni espiritu hosi sena (adegan) refere. Loron ba loron, oras ba oras, ha’u le’e fila-fila script ne’ebé iha, koko atu haluha tiha ha’u-nia aan hanesan Cesar Mali no hakaas-aan atu sai duni MARKUS. Defisil tebes atu sai MARKUS ne’ebé tenke halo ema hamnasa iha situasaun ne’ebé nakonu ho tensaun, tauk hosi terror no intimidasaun hosi membru milísia sira.

DILI, 28 agostu 2020 (TATOLI)—Atu hakotu Timor-Leste nia destinu ba ukun rasik-aan la’os de’it iha FALINTIL ka povu Timor-Leste nia liman de’it maibé komedian timoroan ida ne’ebé sai autór nu’udar MARKUS, ne’ebé kontribui halimar komedi hodi dada povu Timor-Leste liuhosi ninia mensajen prinsipál “EMA TENKE PREPARA AN BA VOTA, EMA HOTU TENKE VOTA, VOTA HO LOLOOS, VOTA HO KONTENTE, VOTA LA HO TAUK” iha Konsulta Populár loron 30 agostu tinan 1999 liu ba ne’e.

Tanbasá no oinsá mak timoroan ne’e hetan oportunidade nu’udar autór sai MARKUS liuhsi halimar komedi no fó sai iha ekran Televisi Republik Indonesia (TVRI), bele akompaña timoroan ne’e ninia istória liuhosi entrevista ne’ebé Jornalista Agência TATOLI, Cancio Ximenes, hala’o ho autór MARKUS (jornalista senior ida), Cesar Moniz Mali, liuhosi WhatsApp (WA), sesta ne’e, hodi haktuir ninia istória ho loloos;

Ha’u mak MARKUS

Tansa tenke ha’u mak halo MARKUS, la’ós ema seluk? Tuir loos ne’e, MARKUS ne’e la’ós ha’u maibé ema seluk ida-ne’ebé nia naran kompletu MARKUS NABUAN (ema Atambua) ne’ebé servisu iha Hotel Mahkota, Dili, nu’udar room boy iha Hotel Mahkota (agora Hotel Timor). Momentu ne’ebá, ha’u nu’udar staff UN (United Nation) ne’ebé aluga kuartu balun iha Hotel Mahkota sai ami-nia office (edifisíu).

Ami-nia Seksaun Public Information Office (PIO) UNAMET nian mak responsabiliza kona-ba publikasaun informasaun sira inklui halo kampaña kona-ba referendu, halo edukasaun votantes/eleitorál kona-ba oinsá ema ba vota iha referendu (konsulta popular) ho di’ak no vota ho loloos.

Momentu ne’ebá, ha’u tama iha ekipa ne’ebé halo produsaun video. Ami produs PSA, Drama, Poezia, mensajen, aiknananuk sira no seluk-seluk tan. Ami halo produsaun lubun inklui múzika “Oras To’o Ona” ne’ebé Lahane Group mak hananu, poezia “Ha’u Hirus”, komedi MARKUS no selu-seluk tan.

Kona-ba MARKUS

Hafoin ami-nia ekipa halo no hakerek script, ami ko’alia ho Manajer Hotel Mahkota atu fó sira-nia ema ida atu ami bele treina nia, atu sai autór komedia nian hodi realiza produsaun ne’ebé ami dezeña ona. Iha Scene ka epizodu lubuk ida mak ami atu prodús. Nune’e, Manajer Hotel Mahkota introdus ninia staff (room boy) ida naran MARKUS NABUAN.

Ami hahú fó treinamentu ba MARKUS NABUAN no terinu loro-loron. Enfelizmente, treinamentu no ensaiu barak ona ami halo maibé ami nota katak MARKUS NABUAN ladún iha jeitu atu realiza ninia acting tuir script ne’ebé iha. Ami hotu stress tanba tempu la’o daudaun. Períodu kampaña menus fulan ida de’it ona enkuantu MARKUS NABUAN kontinua hatudu ninia inkapasidade acting.

Cesar Mali hatais MARKUS nia farda. Imajen/Repro. hosi video MARKUS UNAMET.

Haree ba labele liu ona, ami-nia ekipa deside troka ho ema (actor) seluk. Antes ami hili ema seluk hodi troka MARKUS NABUAN, ha’u-nia kolega malae (staf internasional) ne’ebé nu’udar produser ba programa ne’e husu ha’u atu koko to’ok adegan (sena) refere. Ha’u mós ho halimar halo acting tuir script ne’ebé iha. Haree tiha ha’u-nia acting, nia kontente tebes hodi hateten; “Great. You can do it!”. Sira husu ha’u halo fila-fila. Ha’u la espera, enkontru ekipa nian be tuir mai, ekipa deside ha’u mak troka fali MARKUS NABUAN ba produsaun komedi refere.

Fofoun ha’u rejeita. Ha’u sente laiha jeitu ba acting ida-ne’e. Maibe, kolega sira iha ekipa laran louva ha’u-nia acting no kontinua fó aten brani ba ha’u hodi realiza acting refere ba ami-nia produsaun.  

Haree ba tempu ne’ebé la’o daudaun, períodu kampaña hela de’it semana rua ona no ami seidauk konsege hetan ema seluk, ikus mai ha’u deside atu simu ekipa nia pedidu atu ha’u mak troka MARKUS NABUAB. Ami kontinua halo treinamentu, ensaiu no halo produsaun ba epizodu ida ba epizodu seluk.

Maske ha’u substitui ona MARKUS ida lololoos (asli) ne’e, maibé ami desidi kontinua uza naran MARKUS tuir ninia script ka senáriu orijinál ne’ebé iha nanis ona.

Produsaun la’o ho di’ak no ha’u mosu iha Televizaun kuaze loro-loron. Ha’u sente ema hotu haksolok ho ha’u-nia karáter TV ho naran MARKUS. Maibé, terus-terang (frankamente), ha’u rasik la gosta acting MARKUS ne’e. Ha’u-nia namorada mós la gosta hafoin nia haree tiha epizodu balun hosi epizodu lubun ida.

Mensajen Ne’ebé MARKUS Fó Ba Públiku

Hosi produsaun komedi ne’e, autór MARKUS fó mensajen prinsipál lubuk ida ba publiku liuhosi ninia karáter tuir sena (adegan) ne’ebé hatudu mak liuhosi mensajen prinsipál tolu (3) mak hanesan; “Ema hotu tenke ba vota, vota ho loloos. no vota la ho tauk”.

Cesar Mali MARKUS.

Bainhira ha’u aseita no deside atu simu adegan MARKUS (sai Markus), ha’u esforsu aan atu realiza duni espiritu hosi adegan (sena) refere. Loron ba loron, oras ba oras, ha’u lee fila-fila script ne’ebé iha koko atu haluha tiha ha’u-nia aan rasik hanesan Cesar Mali, no hakaas aan atu sai duni MARKUS (ha’u esforsa aan menghayati papel nu’udar MARKUS). Defisil tebes atu sai MARKUS ne’ebé tenke halo ema hamnasa iha situasaun ne’ebé nakonu ho tensaun, tauk hosi terror no intimidasaun sira hosi membru milísia pro-autonomia sira-nia leet.

Ba ha’u, ne’e misaun boot ida ne’ebe ha’u tenke alkansa duni. Ha’u tenke realiza duni atu halibur, haksolok no fó aten barani ba votantes sira, enkoraja ema hotu ba vota iha sentru votasaun hodi hili povu no rai-lulik Timor-Ldeste nia destinu no nia future hanesan ansaun ida lulik no soberanu.

Hanesan ha’u dehan ona, adegan (sena) ida-ne’e difisil tebes, tanba ha’u tenke halo jeitu no jestu hanesan ema defisiente ida-ne’ebé ko’alia lahatene. Komunika ho jestu de’it. Maibé, ha’u ho ami nia ekipa sira halo esforsu no meiu oin-oin ho pasiénsia atu realiza dunik produsaun ida-ne’e tanba tempu la’o daudaun ba oin. Oráriu atu halo produsaun hela sura loron de’it ona. Ami halai hadau malu ho tempu. Ami aprezenta ideia ba malu, kurije malu no enkoraja malu. Ami-nia ekipa produsaun hasai enerjia tomak hodi realiza produsaun ida-ne’e, to’o dalaruma ami hakilar malu, hirus malu, tanba servisu barak demais no komplikadu tebes, halo ami hotu kolen.

Ami hotu-hotu servisu iha perigu no ameasa nia laran. Milísia sira halo terror no intimidasaun oin-oin maibé ha’u ho ami-nia ekipa sempre buka dalan, maneira no tátika oin-oin atu sees hosi ameasa sira ne’e hodi bele realiza produsaun komedi MARKUS. Bainhira ami halo filmajen iha fatin ruma ne’ebé derepente ami sente la seguru, ami tenke sees-aan muda fali ba fatin seluk. Situasaun ida hanesan ne’e, MARKUS ho nia ekipa enfrenta loro-loron.

Iha epizodu lubuk ida ne’ebé ha’u nu’udar MARKUS tenke realiza mak hahú hosi prosesu rejistu, kampanha to’o ba iha votasaun. Hafoin halo tiha filmajem ka shooting ba sena balun, ha’u hahú sente katak MARKUS nia prezensa iha ekran TV importante tebes ba povu telespetadores tomak liuliu votante sira.

Mensajen ne’ebé MARKUS hakarak hato’o ba publiku “forte no determinante” tebes mak;  EMA TENKE PREPARA AN BA VOTA, EMA HOTU TENKE VOTA, VOTA HO LOLOOS, VOTA HO KONTENTE, VOTA LA HO TAUK.

Komserteza produsaun no realizasaun MARKUS iha ekran TV nia halo antes de prosesu votasaun tomak. Ema haree MARKUS iha Televizaun halo ema hamnasa no kontente, halo ema haluha tiha situasaun intimidasaun, terror no ameasa sira. Ha’u-ata dalan ruma matan-ween turu haree ema kontente tanba MARKUS bele halo sira hamnasa iha tempu ne’ebé ema hotu nia vida ameasadu.

Cesar Mali MARKUS.

Maibé la’ós MARKUS mesak mak halo ema hamnasa. Iha mós produsaun sira seluk ne’ebé la’ós de’it halo ema hamnasa maibé inspira ema atu hasa’e ema-nia aten brani hodi labele rende ba situasaun ne’ebé nakonu ho terror no intimidasaun. Karik ita sei hanoin AVO FETO OTONOMI, GRUPU LAHANE HO SIRA NIA MUZIKA “ORAS TO’O ONA”, TIU IDA LORI POEZIA “HA’U HIRUS” no mós drama sira seluk inklui PSA (mensajen públiku) ne’ebé prodús hosi ami nia ekipa Public Information Office (PIO) hosi UNAMET.

MARKUS halo ema kontente no hamnasa, haluha tiha sira-nia tauk hodi hakat ba fatin votasaun hodi deside povu no rai-lulik Timor-Leste nia destinu no futuru. Ba ha’u, ne’e hanesan kontribuisaun ki’ik-oan ida maibé ha’u sente onradu tebes tanba bele envolve iha prosesu ida hodi eduka no enkoraja ema halo desizaun hodi deside sira-nia futuru no destinu nasaun nian.

Ba timoroan sira ne’ebé tuir votasaun Konsulta Popular iha 30 agostu 1999, maske iha tinan ida-ne’e loron Konsulta Populár ba dala-21 (30 agostu 1999-30 agostu 2020) ona, karik sei bele lembra MARKUS nia kontribuisaun iha momentu ne’ebá.

Ba jerasaun foun sira, dalaruma sei husu MARKUS ne’e sé no halo saida lerek, maibé lori MARKUS nia kontribuisaun mak povu Timor-Leste hakbesik-aan ba sentru votasaun liuhosi ninia mensajen prinsipál “EMA TENKE PREPARA AN BA VOTA, EMA HOTU TENKE VOTA, VOTA HO LOLOOS, VOTA HO KONTENTE, VOTA LA HO TAUK” iha Konsulta Populár loron 30 agostu tinan 1999 liu ba ne’e. Kmanek ba MARKUS no kmanek ba CESAR MONIZ MALI..!

Jornalista: Cancio Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here