Mediadór DNPKK Lospalos, Mateus da Costa. Imajen TATOLI/Osória Marques.

DILI, 28 agostu 2020 (TATOLI)–Mediadór Diresaun Nasionál Prevensaun Konflitu Komunitária (DNPKK) Lospalos, Mateus da Costa, informa mediadór DNPKK iha munisípiu sira laiha fasilidade prevensaun ba konflitu komunitária iha terrenu.

Notísia Relevante: Formasaun ‘Matadalan Mediasaun Sensivél Jéneru’ eleva mediadór DNPKK nia kapasidade

“Ami mediadór DNPKK iha munisípiu sira laiha fasilidade prevensaun ba konflitu komunitária iha terrenu. Durante ne’e ami uza de’it mak ami-nia kbiit rasik mak hodi halo servisu liuliu halo mediasaun ba prevensaun konflitu ruma,” informa Mediadór DNPKK Lospalos, Mateus da Costa, ba jornalista sira iha salaun João Paulo II Comoro, Dili, foin lalais ne’e. 

Nia parte preokupa tebe-tebes ho fasilidade no ekipamentu prevensaun ne’e tanba bainhira halo mediasaun ne’e presiza ekipamentu ka fasilidade ruma hodi prevene tanba hasoru krime.

“Ami preokupa mak fasilidade no ekipamentu prevensaun mediasaun ba konflitu komunitária iha terenu tanba laiha duni hodi ajuda ami-nia servisu. Ita hatene katak servisu mediadór ne’e perigozu bainhira ita hasoru krime,” nia relata.

Mateus haktuir, tanba dala barak mediasaun balun labele partisipa no labele hala’o tanba de’it ekipamentu prevensaun no transporte laiha depois distánsia hosi suku ba munisípiu ne’e dook entaun oinsá mak atu halo mediasaun prevensaun ba konflitu ruma.

“Ho ida-ne’e, ha’u hakarak rekomenda hela ba Sekretáriu Estadu Protesaun Sivíl (SEPS) liuliu ba Ministru Interinu Interiór atu tau atensaun ba kestaun hirak ne’e. Tanba ami mós servisu iha defisil nia-laran tanba hasoru konflitu komunitária iha terrenu,” nia dehan. 

Aleinde ida-ne’e, Mediadór Mateus hatete sira servisu durante tinan ida ona maibé laiha nivél (nivél mamuk) ne’ebé mak luta ho $115 ba fulan ida, tanba ne’e oinsá parte relevante nia haree no responde ba preokupasaun ne’e tanba ne’e mediadór mós.

“Tanba ami tauk bainhira hetan dezastre ruma iha mediasaun konflitu nia-laran sé mak atu responsabiliza ba ami-nia kestaun ne’e. Tanba, husu nafatin ba parte kompetente atu responde netik ba ami-nia kestaun ne’e. Ami halo ona karta no hato’o ona iha semináriu balun maibé seidauk iha resposta balun hosi leten,” nia dehan.

Jornalista: Osória Marques

Editór: Cancio Xiemenes

HAKEREK NO HATÁN

Please enter your comment!
Please enter your name here