Bibi Rusa hadau malu bee iha illa Jaco. Imajen Tatoli/Jogerjo Guterres

LAUTÉM, 28 agostu 2020 (TATOLI)-Xefe Aldeia Luru, suku Tutuala, postu administrativu Tutuala, munisípiu Lautém, Narcísio Soares, preokupa tebes ho atitude vizitante sira ne’ebé maka kasa animál-fuik ho kilat manu iha área protejida.

“Kona-ba animál ne’ebé komunidade estraga, ha’u hanoin Governu mak iha kompeténsia atu kontrola tanba Governu autoriza kilat manu tama ilegál, entaun signifika aban bainrua animál sei mohu. Kuandu Governu bandu kilat manu labele tama maka sei proteje animál-fuik sira iha área protejida,” dehan Narcísio Soares, iha ámbitu dada-lia entre komunidade Tutuala ho Governu kona-ba jestaun sítiu turístiku iha Lakumorre, suku Tutuala, sesta ne’e.

Hatán ba preokupasaun ne’e, Diretór Jerál Turizmu, José Filipe Dias Quintas, hateten lei ba kontrola kasa animál-fuik ne’e iha ona maibé implementasaun mak sei fraku.

Diretór Jerál Turizmu, José Filipe Dias Quintas. Imajen/Mídia MTKI

“Ema ho kilat manu tiru animal-fuik hanesan asaun ida laiha responsabilidade, signifika implementasaun lei maka sei fraku. Ami sei koordena ho ministériu relevante hanesan Ministériu Agrikultura no Peska (MAP) no mós Sekretaria Estadu Ambiente (SEA), tanba sira iha lei kona-ba bandu ema labele oho animál fuik, tanba lei atu proteje animál iha maibé implementasaun mak falla,” subliña Diretór Jerál Turizmu.

Dirijente ne’e dehan, bainhira implementa jestaun iha fatin protejida sira, sei envolve mós liña ministeriál sira.

“Kuandu ita implementa ona jestaun ne’e, sei haree ba responsabilidade kada ministériu nian, ita labele kahur jestaun área protejida ho jestaun vizitante nian, tanba jestaun área protejida dekretu-lei iha ona kona-ba jestaun nasionál área protejida maibé to’o agora ita haree ho matan asaun laiha, tanba dehan protejida maibé manu-lin no lenuk sira mós mohu ba bebeik”, nia lamenta.

Diretór Jerál ne’e otimista bainhira Governu hamutuk ho autoridade lokál sira implementa loloos regra sira, bele minimiza ona aktu sira ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here