Primeiru-Ministru, Taur Matan Ruak, akompaña ho Xefe Gabinete, Koordenadora UPMA inklui ekipa tékniku GPM, asiste aprezentasaun kona-ba modelu foun konstrusaun estrada sira, ne’ebé aprezenta hosi reprezentate kompañia Exótica, Lda, iha Palásiu Governu, sexta (28/08). Imajen Tatoli/Egas Cristovão

DILI, 28 agostu 2020 (TATOLI)Primeiru Ministru, Taur Matan Ruak, konvoka reuniaun ho kompañia Renolith, Lda no Exótica, Lda, hodi asiste aprezentasaun modelu foun konstrusaun estrada sira.

Koodenadora Unidade Planeamentu Monitorizasaun no Avaliasaun (UPMA), Brígida Soares, ne’ebé akompaña kompañia rua ne’e haktuir aprezentasaun ohin kona-ba modelu teknolojia soil stabilization ka estabilizasaun solu ba konstrusaun estrada sira.

“Iha aprezentasaun ne’e, Primeiru-Ministru interesante tebes ba aprezentasaun no sei iha tan aprezetasaun ho prezensa hosi Ministru Planeamentu no Ordenamentu no Ministru Obra Públika iha Tempu badak,” tenik Koodenadora UPMA hafoin akompaña empreza rua ne’e reniuan ho Xefe Governu iha Pálasiu Governu, sesta ne’e.

Koordenadora UPMA, Brígida Soares. Imajen Tatoli/Egas Cristovão

Nia dehan, aprezentasaun ba teknolojia foun ne’e haree liu ba modelu rai, métodu fíziku no kímiku, mékaniku, no biolojia hodi amostra atu koverte naturál rai hodi uza ba konstrusaun estrada sira.

“Kompañia rua apreza ba Primeiru-Ministru atu haree ba benefísiu hosi teknolojia foun ne’e, liuliu poupansa tempu no osan ba Estadu atu utiliza ba konstrusaun estrada nasionál no rurál ne’ebé iha kualidade bainhira implementa iha Timor-Leste, tanba sira haree ba modelu rai iha ne’e bele uza ba indústria ne’e,” nia akresenta.

Kompañia rua ne’e sei kontinua halo introdusaun ba ministériu relevante sira, nune’e iha futuru bele implementa ba estrada sira seluk iha Timor-Leste.

Iha biban ne’e, Diretora Jerál Empreza Exótica Unipessoál Lda, Mirabillia Faria Sarmento, hateten modelu teknolojia konstrusaun estrada ho hanaran soil stabilization ne’e hanesan modelu inovativu tebes hodi bele redús kustu, tempu no osan, maibé ho kualidade.

“Ami ko’alia ona ho Primeiru-Ministru no aprezenta ona produtu soil stabilization ba konstrusaun estrada tanba nu’udar timor-oan haree ne’e di’ak no fó benefísiu boot ba nasaun, atu ita bele halo indústria no hakarak loke fábrika iha Timor-Leste hodi prodús teknolojia ne’e ba konstrusaun ba estrada sira,” nia relata.

Diretora ne’e dehan, bainhira indústria hahú loke fábrika, laiha dependénsia ona ba asfaltu no sei hafasil konstrusaun estrada, inklui fó traballu ba timor-oan sira.

“Ami hein hela aprovasaun no rekomendasaun hosi Ministériu Obra Públika atu loke fábrika hodi halo indústria ba soil stabilization, bainhira Governu aseita bele implementa iha Timor-Leste,” nia akresenta.

Kompañia rua ne’e halo ona teste ba konstrusaun estrada ho modelu foun uza matéria soil stabilization iha área Caicoli, Caucau-Lidun no Merkadu Taibessi

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here