Komandante Jerál PNTL, Komísariu Faustino da Costa ho Segundu Komandante Komísariu Mateus Fernandes. Imajen/Egas Cristovão

 DILI, 28 agostu 2020 (TATOLI)–  Komandante Jerál Polísia Nasionál Timor-Leste no ofisiál superiór sira komandu PNTL nian, ohin, iha Kuartél Jeral PNTL, Cacicoli, Dili, hala’o enkontru ho komandante polísia munisípiu 12 no Rejiaun Administrativu Oe-Cusse Ambeno (RAEOA) hodi halo avaliasaun ba  implementasaun Estadu Emerjensia (EE) dahaat tuir Dekretu Governu Nu.10/2020.

Komandante Jeral PNTL, Komisáriu Faustino da Costa, dehan, iha loron 6 agostu 2020, oras 00:00 too loron 4 setembru 2020, oras 23:59, Prezidente Repúblika dekreta Estadu Emerjénsia hodi prevene kalamidade pandemia COVID-19 iha Timor-Leste. Nune’e, PNTL halo servisu tuir diretiva operasionál balun relasiona ho servisu PNTL nian iha ámbitu implementasaun EE dahaat nian bazeia ba Dekretu Governu Nu.10/2020 kona-ba medida lori halo ezekusaun kona-ba deklarasaun EE nu’udar hala’o daudaun tiha ona husi dekretu Prezidente Repúblika Nu.55/2020 de 5 agostu.

“Ami avalia fila fali implementasaun Estadu Emerjénsia dahaat ne’e oinsá dezafiu maka sira hasoru, oinsá maka ita bele hadi’a hamutuk servisu sira-ne’e,” dehan Komandante Faustino ba jornalista hafoin sorumutuk ne’e.

Nia dehan, tuir avaliasaun no relatóriu komandu PNTL katak, implementasaun EE ne’e PNTL no ekipa Ministériu Saúde halo servisu másimu nafatin hodi sosializa regra tuir saúde nian, maibé populasaun balun konsidera EE hanesan prosesu normal ida.

“Ita sensibiliza nafatin regra no informasaun, maibé ema sente hanesan baibain, maibé ami nia knaar maka koopera no buka konvense povu para koopera,” nia hateten.

Durante enkontru, Komandante Jerál PNTL ne’e fó orientasaun ba komandante munisípiu hotu- hotu hodi halo kontrolu maka’as ba seguransa tránzitu nian hodi asegura sidadaun sira halo movimentu ho transporte labele hasoru beibeik asidente tráfegu ne’ebé kauza ema barak mate.

Komandante munisípiu 12, inklui RAEOA mós aprezenta dadus kona-ba asidente tráfegu no kazu krime iha munisípiu tinan ne’e ladun akontese maka’as, mezmu iha Munisípiu Baucau maka rejista kazu asalta-malu no kazu sunu uma iha Nunira-Laga ne’ebé ninia prosesu lori ona ba Ministériu Públiku.

Ikus liu, komandu PNTL munisípiu sira mós aprezenta dezafiu ne’ebé sira hasoru maka daudaun ne’e transporte balun komesa aat ona, no menus lojístika sira seluk, maibé sira mantein halo nafatin seguransa.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here