Membru Governu sira wainhira partisipa iha Exersisiu Fisiku no desportivu ba moris saudavel neebe organiza husi Ministeriu Edukasaun Juventude no Desportu. Aktividades exersisiu nee hahu husi Palacio Governu nia oin ba too iha Ponte B.J Habibie, Sesta 28 Agostu 2020. Imajen/Antonio Goncalves

DILI, 28 agostu 2020 (TATOLI)–Ministériu Edukasaun Juventude no Desportu (MEJD) koordena hamutuk ho Sekretaria Estadu Juventude no Desportu (SEJD), sesta ne’e realiza programa “Car Free Zone” hodi marsa husi Palácio do Governo to’o Ponte B.J Habibie Bidau Lecidere, Dili.

Tema husi “Car Free Zone” ne’e maka fó espasu ba ezersísiu fíziku no desportivu ita moris saudável divertidu no redúz poluisaun.

Ministru Edukasaun Juventude no Desportu, Armindo Maia, hateten programa ne’e realiza ho objetivu atu hametin liután desportu ba ema hotu ho di’ak tanba oras ne’e ema barak ladún prátika desportu.

“Atividade ida-ne’e inisiativa hosi SEJD ho estrutura tomak. Ami apoiu tebes, tan ida-ne’e oinsá atu hametin desportu no mós bele sai kulutra ida ba ita hodi hadook an hosi moras oin-oin ne’ebé iha,” nia dehan iha Bidau Lecidere.

Iha fatin hanesan, Sekretáriu Estadu Juventude no Desportu, Abrão Sandanha, hateten programa ne’e naran zona livre husi veíkulu.

“Ita hakarak atu limite duni movimentasaun veíkulu sira iha fatin ida-ne’e ho intensaun atu kontribui maski uitoan ba hatún poluisaun ne’ebé mak hamosu husi karreta no motór sira-nia su’ar,” Abrão tenik.

Programa ne’e partisipa husi MAE, MTKI, MI, MEJD, SECOMS, SEMA, SEJD no seluk tan.

Aleinde ne’e, partisipa mós husi modalidade desportiva sira hanesan Taekwondo, Karatedo, Padjadjaran no funisionáriu públiku sira.

Jornalista: Hortencio Sanchez

Editór: Agapito dos Santos

HAKEREK NO HATÁN

Please enter your comment!
Please enter your name here