Cristo Rei. Imajen/Espesiál

DILI, 28 agostu 2020 (TATOLI)-Diretór Asosiasaun Otelaria Timor-Leste (AHTL, sigla portugés), Tony Jape, konsidera dalan di’ak ba rekuperasaun ekonómika iha setór turizmu  maka Governu presiza mobiliza populasaun hodi envolve iha kampaña ne’ebé hanaran promosaun turizmu doméstiku, nune’e bele hamosu fali merkadoria foun.

“Durante krize COVID-19, país barak mak hahú foku ba turizmu doméstiku atu ajuda empreza turizmu sira kontinua mantein sira-nia negósiu no ultrapasa krize COVID-19. Timor-Leste tenke halo tuir ezemplu ida-ne’e liuhosi kampaña turizmu doméstiku, ita bele kria merkadoria foun ba kliente timor-oan sira iha munisípiu hotu atu partisipa no sei hetan benefísiu hosi inisiativa ida-ne’e rasik,” tenik Tony Jape, hafoin semináriu  aprezentasaun programa promosaun turizmu, iha Timor Plaza, sesta ne’e.

Tuir nia, krize COVID-19 nu’udar oportunidade ida ba Timor-Leste atu dezenvolve no hadi’a setór turizmu iha Timor-Leste.

“Karik Timor-Leste trata krize atuál hanesan oportunidade ida atu dezenvolve no hadi’a ninia oferta turizmu doméstiku, Timor-Leste sei iha pozisaun di’ak atu kompete iha merkadoria internasionál,” Tony Jape subliña.

Ajénsia Dezenvolvimentu Nasionál Estadu Unidu (USAID) ne’ebé envolve iha kampaña ne’e, konsidera programa kampaña promosaun turizmu doméstiku nu’udar oportunidade ba empreza turizmu sira atu envolve diretamente iha atividade fa’an produtu no servisu públiku.

Tuir USAID, projetu ne’e sei realiza iha 2020 no 2021, atu komunidade sira bele sirkula osan ba produtu no servisu turizmu, hanesan hola kafé ka han, nune’e mós ba atividade turizmu seluk.

“Envolve iha atividade tour iha rai-laran, vizita fatin atrasaun turístiku iha munisípiu, staycation iha otél, esperiénsia luku-tasi, lao sa’e foho no seluk tan,” refere nota hosi ajénsia internasionál ne’e.

Atividade “ha’u-nia Timor-Leste, kampaña promosaun turizmu doméstiku” ne’ebé USAID halo ne’e sei fó benefísiu no sei kontinua hafoin krize COVID-19 hodi kria merkadu lokál ne’ebé bele haforsa liután setór turizmu.

“Dezenvolve serbisu parseria (cooperative marketing) sei haforsa liután setór turizmu to’o bainhira ita prontu simu filafali turizta internasionál,” subliña nota hosi USAID.

Projetu ne’e sei fornese tenda ba kompañia no organizasaun  sira atubele distribui materiál promosaun no halo interasaun ho públiku, nune’e mós sei iha palku aprezentasaun dansa kulturál, banda muzika no fahe prémiu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here