Bee-moos. Imajen/Espesiál

DILI, 28 agostu 2020 (TATOLI)- Xefe Departamentu Abastesementu Água Munisípiu Dili, Francisco Perreira Xavier hatete Xefe ne’e haktuir katak bee-moos menus tanba kauza hosi bailoron naruk tanba ne’e mak komunidade sira ne’ebé mak iha foho-leten labele asesu bee-moos ho di’ak.

Notísia Relevante: Ekipa task force DNSA normaliza bee bomba estasaun Comoro

“Bee nia débitu degradasaun menus ba beibeik tanba bailoron naruk no komunidade balun dala ruma bee iha no dalaruma mós bee laiha tanba sira hela liu iha rai-aas entaun bee labele sa’e. Maibé ami nafatin esforsu no hakaas-aan atu kontinua kontrola bee ne’ebé mak estraga iha dalan ninin para nune’e bee ne’ebé bele to’o iha komunidade ne’ebé mak hela iha rai-aas ne’e,” dehan Xefe Departamentu Abastesementu Água Munisípiu Dili, Francisco Perreira Xavier, jornalista TATOLI, iha nia knaar fatin, Caicoli, Dili, ohin.

Nia dehan alvu (target) ba komunidade sira iha foho leten ka rai-aas ne’ebé área urbana nian ne’e tenke hetan ka asesu bee-moos. DNSA iha tékniku atu haree ba sistema bee ne’e atu oinsá ema iha foho leten mós asesu bee-moos hosi DNSA nian.

“Aagora ami iha konsultan ida kona-ba detelle engeneering design entaun ho opurtunidade ida-ne’e ami fó sujestaun atu halo isolasi sistem ida para komunidade ne’ebé mak hela iha rai lolon nia rede ketak, nune’e halo ketak rede para sira ne’ebé mak hela iha rai lolon sei hetan ka asesu bee-moos,” nia dehan. 

Nia dehan Dili área urbana nian maibé dala barak komunidade iha suku balun ne’ebé hela iha foho-leten ladún asesu bee-moos liuliu sira ne’ebé hela Bedois, Tasi-Tolu, Manleuana, no seluk tan.

“Komunidade sira ne’ebé hela rai-lolon hanesan iha Suku Bedois, Taibesi Aituri-laran, Manleuana Ramelau, Tasi-tolu Maslidun mak to’o agora ladún asesu ba bee-moos ho di’ak tanba sira hela iha rai-aas ka foho leten,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here