Arguida ba kazu soe bebé iha Ailok-Laran ba hatán iha Tribunal Distrital Dili, 27 agostu 2020. Imajen/Nelson de Sousa

DILI, 27 agostu 2020 (TATOLI)-Tribunál Distritál Dili (TDD) liuhusi prosesu sumáriu, ohin, aplika medida prizaun preventiva ba kazál (feto-mane) ne’ebé soe bebé iha area Ailok-Laran, Dili, iha loron 16 agostu 2020.

Notísia Relevante : Pe. Juvito: “Soe Bebé Ne’e Irresponsabilidade Morál”

Kazál ne’ebé sai arguidu no arguida ba kazu soe bebé ne’e ho inisiál ND no FA ne’ebé konfesa ba Tribunál katak, sira na’in-rua nu’udar namoradu no tuir interrogatóriu ne’ebé arrola husi Ministériu Públiku  (MP) prova iha auto katak iha indísiu forte arguidu ho arguida mak soe bebé ne’e.

Arguidu ba kazu soe bebé iha Ailok-Laran ba hatán iha Tribunal Distrital Dili, 27 agostu 2020. Imajen/Nelson de Sousa

Ho medida ne’e oinsá atu  mós bele  asegura hodi fasilita prosesu investigasaun tuir mai. Ministériu Públiku (MP) akuza arguida ND ho krime infantisídiu  (oho kosok-oan ne’ebé foin moris)   previstu iha artigu 146 iha kódigu penál Timor-Leste ne’ebé hateten, inan ne’ebé oho oan durante partu ka hafoin ida-ne’e no sei iha nia influénsia sei kastigu ho pena prizaun tinan-rua (2) to’o tinan-10.

MP mós  akuza  arguidu FA ho krime interrupsaun ba gravidés ne’ebé previstu iha Artigu 144  ne’ebé hateten iha númeru 1 – se mak liuhusi kualkér meiu no lahó konsentimentu husi feto kabuk halo abortu sei kastigu ho pena prizaun tinan-rua (2) to’o tinan-ualu (8).  2 – sé mak liuhusi kualkér meiu no lahó konsentimentu husi feto kabuk nian hodi halo abortu sei kastigu ho pena prizaun to’o tinan-tolu (3).  3 – feto kabuk ne’ebé konsente ba abortu husi terseiru, ka ne’ebé tanba faktu rasik ka husi ema seluk hodi halo abortu sei kondena ho pena prizaun to’o tinan-tolu (3).

Audiénsia julgamentu ne’e prezide husi Juiza Edite Palmira, Ministériu Públika reprezenta husi Prokudór Jacinto Babo no arguida ho arguidu hetan asisténsia legal husi defensór públiku na’in-rua.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here