Komandante Polísia Munisípiu Covalima, Superintendente, António Maria de Sá. Imajen/Eugénio Pereira

DILI, 27 agostu 2020 (TATOLI)- Komandu Polísia Munisípiu Covalima koopera ho Unidade Patrullamentu Fronteira (UPF) kaptura membru grupu organizasaun arte marsiál (GAM) balun no halo apreensaun mós atributu grupu refere.

Notísia Relevante : PNTL alerta ba membru PSHT ho IKS Kera Sakti hapara viajen ilegál ba Indonézia

PNTL Covalima ho UPF kaptura membru GAM sira-ne’e bainhira tenta halo viajen ilegál husi Timor-Leste tama ba Atambua, Indonézia, ho objetivu atu ba partisipa ritual sa’e sabuk ka  pengesahan.

PNTL no UPF mós kaptura mós sidadaun Indonézia balun ne’ebé halo atividade kasa manu ilegál lori kilat manu (senapan angin) tama too área Timor-Leste nian.

“Ami kaptura mós membru GAM balun no halo mós apreensaun ba atributu ne’ebé konsidera viola lei arma branka númeru 5/2017,” informa Komandante  PNTL Munisípiu Covalima, Superintendente António Maria de Sá, ba Agência Tatoli iha Sentru Akademia Polísia, Comoro, Dili, kuarta (26/08).

Atributu ho membru arte marsiál ne’ebé PNTL halo apreensaun no kaptura pertense ba grupu GAM Persaudaraan Setia Hati Terate (PSHT) no Ikatan Keluarga Silat (IKS) Kera Sakti.

Nia dehan, mezmu Governu Timor-Leste reativa fila ona atividade grupu arte marsiál tolu (PSHT, IKS Kera Sakti no KORK) hodi halo atividade, maibé PNTL kontinua kontrola no implementa nafatin regra Estadu Emerjénsia hodi  la autoriza sidadaun sira halo viajen ilegál hodi kontribui prevensaun Coronavirus ka COVID-19.

Sasán sira ne’ebé PNTL halo apreensaun aprezenta ona ba Ministériu Públiku hodi prosesa tuir lei ne’ebé vigora.

Dezde Estadu Timor-Leste deklara Estadu Emerjénsia ba dahaat, too ohin, PNTL Covalima hetan apoiu másimu husi UPF, Unidade Espesiál Polísia (UEP) no F-FDTL hodi  garante nafatin seguransa iha liña fronteira terrestre.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here