Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 27 agostu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, ohin, iha Palaçio Prezidénsia,   hala’o enkontru ho Prezidente Repúblika (PR), Francisco Guteres “Lú Olo”, hodi atualiza situasaun seguransa nasionál.

Notísia Relevante : Semana ne’e, asidente tráfegu rezulta vítima na’in-neen mate

Enkontru semanál entre PR Lú Olo ho Komandu PNTL ne’e mós atualiza konflitu entre grupu juventude balun ne’ebé akontese iha Nunira, Postu Administrativu Laga, Munisípiu Baucau, kazu asidente tráfegu ne’ebé rezulta ema na’in-39 mate, inklui kazu mate isin ne’ebé hetan iha area Tibar, Liquiça, foin lalais ne’e.

“Ami aprezenta sitasaun seguransa iha ita nia rai laran la’o di’ak no kazu ne’ebé akontese iha Manatuto da’et too Baucau Vila Nova e Nunira, Laga nia prosesu la’o hela. Ami identifika ona suspeitu balun hetan medida koasaun balun iha parte justisa no kazu balun sei la’o hela,” informa Komisáriu Faustino da Costa, ba jornalista hafoin enkontru ho PR Lú Olo.

Komandu PNTL Munisípiu Baucau ne’ebé lidera husi Superintendente Xefe Armando Monteiro koopera ho F-FDTL no autoridade lokál sira mós kontinua buka rezolve problema kazu Nunira-Laga hodi halo diálogu  hodi prevene konflitu labele akontese tan iha fatin seluk.

Iha parte seluk, PNTL aprezenta mós kazu mate isin ida ne’ebé PNTL hetan iha área Tibar, Liquiça nian halo ona investigasaun no parte família hatene ona mate isin ne’e hodi hein prosesu autópsia iha Ospitál Nasionál Guido Valadares (HNGV).

Vítima ne’ebé mate ho idade tinan 60 liu ne’e sai husi uma la fila too mate, tanba sofre moras mental. Nune’e PNTL husu halo autópsia hodi identifika loloos kauza husi vítima nia mate.

PNTL aprezenta mós ba PR Lú Olo kona-ba situasaun servisu Polísia Departamentu Nasionál Tránzitu no Seguransa Rodoviária ne’ebé lidera husi Superintendente, João dos Reis Belo, hodi servisu maka’as atu minimiza asidente tráfegu iha Dili too munisípiu.

Durante janeiru too 31 jullu 2020, asidente tráfegu akontese hamate ema na’in-39, no ema na’in-29 mate la iha karta kondisaun, ema na’in-25 mate tanba uza motór Beat, signifika motór ne’e la seguru. Husi motorista 39 ne’e identifika mós motorista na’in-lima iha karta kondisaun, maibé la hatene lee no la hatene hakerek.

Kona-ba motorista sira ne’ebé la hatene hakerek no lee, maibé hetan karta kondisaun, parte PNTL sei  konfirma ho Diresaun Nasionál Transporte Terrestre (DNTT) hodi buka hatene problema ne’e hodi hetan solusaun.

“Ida ne’e maka ami haree oinsá buka atu koordena ho parte relevante hodi haree situasaun ne’e para bele redús asidente ka insidente kauza too ema mate,” Faustino da Costa tenik.

Nia  aprezenta situasaun Estadu Emerjénsia dahaat ne’e haree ba seguransa iha territóriu nasionál la’o di’ak no Komandu PNTL koloka tan membru Unidade Espesiál Polísia (UEP) hodi reforsa seguransa hamutuk ho Unidade Patrullamentu Fronteira  (UPF) iha liña fronteira Terrestre Bobonaro no Covalima, inklui koloka Unidade Polísia Marítima (UPF) hodi reforsa seguransa iha tasi área Batugade nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here