Primeiru-Ministru, Taur Matan Ruak. Imajen Tatoli/Egas Cristovão

DILI, 27 agostu 2020 (TATOLI) Primeiru-Ministru, Taur Matan Ruak, informa  proposta tetu Orsamentu Jerál Estadu (OJE) 2020 ne’ebé Konsellu Ministru aprova ona sei inklui mós gastu Dotasaun Orsamentu Temporáriu (DOT) durante fulan-10 nian.

Xefe Governu hato’o kestaun ne’e hafoin enkontru semanál ho Prezidente Repúblika, Francisco Guterres ‘Lú Olo’ hodi informa preparasaun Governu ba elaborasaun proposta  OJE 2020 no 2021 no prepativu implementasaun planu rekuperasaun ekonómiku.

“OJE 2020 ho montante biliaun $1,497 ne’e, konta hosi janeiru to’o dezembru tinan ne’e, entaun kompostu orsamentu ne’ebé mak ita gasta ona iha DOT. Orsamentu ne’ebé mak ita gasta daudaun no sei gasta depois,” tenik PM Taur, iha Palásiu Prezidensiál, Bairro Pité, kinta ne’e.

Notísia Relevante: KM aprova tetu OJE 2020 biliaun $1,497, aumentu millaun $1,49

Iha loron 29 juñu, Konsellu Ministru estraorinária aprova ona tetu OJE 2020 ho valór biliaun $1,492,3, maibé tanba iha ajustamentu balun maka montante ne’e sa’e oituan ho aumentu millaun $1,49 sai biliaun $1,497 .

“OJE 2020 sei kontinua fahe ba kategoria sira hanesan saláriu no vesimentu, bens no servisu, kapitál dezenvolvimentu no kapitál menór inklui tranferénsia públika ne’ebé sei kontinua hanesan orsamentu Jerál Estadu bainbain ne’ebé akontese,” Xefe Governu akresenta.

Tuir kalendáriu ne’ebé Governu iha ona, OJE 2020 sei submete iha Parlamentu Nasionál (PN) iha loron 15 setembru no OJE 2021 sei submete iha 15 outubru.

Bainhira OJE 2020 mak pasa, gastu efetivu iha fulan novembru no dezembru.

Tetu OJE 2020 ho montante billaun $1,497, fahe ba kategoria saláriu no vensimentu millaun $206,8, bens no servisu millaun $496,7, tranferénsia públika millaun $571,1, kapitál menór millaun $8,9, akapitál dezenvolvimentu millaun $213,4.

Orsamentu 2020 maihosi reseita doméstika millaun $172,3, hosi Rendimentu sustentável estimadu (RSE) millaun $544,3 sai millaun $316,6, tanba osan la to’o (défise) foti exesu hosi fundu mina-rai millaun $477 liu RSE, no totál levantamentu hosi fundu mina-rai hamutuk billaun $1,011.3.

Diskrisaun DOT

Utilizasaun DOT sura hosi janeiru 2020 tanba proposta OJE 2020 la pasa iha PN no rejime duodesimál ne’e rasik sei ramata automatikamente bainhira orsamentu tama iha vigór.

Dotasaun ba janeiru ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

DOT ba fevereiru ho montante $116.449,057, ne’ebé totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953.

Ba fulan-marsu ho montante $116.449,057, ne’ebé husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór.

DOT ba abríl iha ho montante $114.887.000, la inklui empréstimu.

Governu fiksa DOT ba fulan-maiu nian ho montante millaun $122 (inklui empréstimu) maibé bainhira esklui empréstimu millaun $114, ne’ebé fahe ba kategoria haat hanesan saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menór.

DOT ba juñu nian ho montante millaun $122,3 inklui pagamentu ba empréstimu.

Enkuantu ba jullu nian ho valór millaun $120,531.5 ne’ebé inklui mós pagamentu ba empréstimu, enkuantu eksklui empréstimu sai millaun $113,281.5.

Fahe ba kategoria lima hanesan saláriu no vensimentu millaun $17,981,2, bens no servisu millaun $40,186.7, tranferénsia públika millaun $26,721.1, kapitál menór millaun $2,251.1 no kapitál dezenvolvimentu millaun $33,391.

Governu fiksa DOT agostu ho montante millaun $118.

Antes ne’e, Vise-Ministra Finansa, Sara Lobo Brites, informa durante implementasaun Estadu Emerjénsia Governu ladún iha atividade tanba ne’e maka gastu reál mensál hamutuk pur volta millaun $56 to’o $65.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here