Lansamentu GTI ba eis propriasaun projetu konstrusaun sistema drenajen no saneamentu iha kapitál Dili, iha otél Novo Turizmu, Lecidere, kinta (27/08). Imajen/Mídia MOP

DILI, 27 agostu 2020 (TATOLI)-Projetu konstrusaun sistema drenajen no saneamentu iha kapitál Dili sei afeta uma-kain hamutuk 746, kompostu hosi postu administrativu Nain-Feto uma-kain 141, Vera Cruz uma-kain 121, Dom Aleixo uma-kain 381 no Cristo Rei uma-kain 153.

Ministru Obra Públika, Salvador Eugênio Soares dos Reis Pires, informa totál kustu ba projetu konstrusaun sistema nasionál iha kapitál Dili, tuir aprezentasaun husi konsultór hamutuk millaun $350.

“Millennium Challenge Corporation (MCC) hosi Governu Estadu Unidu Amerika (EUA) atu ajuda liuhosi Compact Development Team Timor-Leste (CDT-TL), serbisu hamutuk ho MCC EUA providénsia millaun $210 ba konstrusaun drenajen,” tenik Ministru Salvador hafoin halo lansamentu ba Grupu Tékniku Interministeriál (GTI) eis propriasaun ba projetu konstrusaun sistema drenajen no saneamentu iha kapitál Dili, iha otél Novo Turizmu, Lecidere, kinta ne’e.

Notísia Relevante: Governu hahú sosializa projetu drenajen Dili ba komunidade afetadu

MOP-SEA Estabelese Komisaun Impaktu Ambientál ba Projetu Saneamentu no Drenajen Dili

Tuir Governante ne’e, MCC hakarak tulun Timor-Leste tanba ho hanoin ida atu kombate problema saúde atubele kontribui ba sidadaun ne’ebé mais produtivu no dezenvolvimentu ekonómiku iha rai-laran.

Ministru Salvador informa, atividade GTI hanesan preparativu ne’ebé Governu liuhosi ekipa interministeriál realiza ona hanesan Komisaun Avaliasaun Impaktu Ambientál (KAIA) iha fulan-jullu liubá no halo ona konsultasaun ho komunidade afetadu iha postu administrativu Nain-Feto, Vera Cruz, Com Aleixo no Cristo Rei.

Atividade ne’e hanesan rekezitu ida ba projetu kontrusaun sistema drenajen no saneamentu, nune’e iha prosesu konstrusaun labele fó impaktu ka problema sosiál seluk hosi investimentu ne’ebé Governu halo.

“Ita espera katak la’ós de’it depende ba Governu, tanba fundu ne’e maihosi kompaktu no preparasaun sira atu atribui prontidaun husi fundu ne’e rasik. Husi MCC, tarde liu ita hanoin katak Governu Timor-Leste ho MCC, Governu Estadu Unidu Amerika bele tama ona akordu atu hala’o kompaktu ne’e rasik iha tinan oin, tarde liu tinan 2022,” Salvador afirma.

Nia realsa, daudaun ne’e iha opsaun rua ba prosesu indiminizasaun ba komunidade afetadu maka finansia hosi MCC no seluk hosi Governu Timor-Leste.

“Hosi preparativu sira ne’e, Governu sei haree opsaun efetivu liu atu dudu projetu bele komesa ona. Ita mós iha ona ideia katak atu ajuda implementasaun projetu ne’e la’o lalais indiminizasaun ne’e Governu mak investe, atubele halo preparativu sedu liután hodi viabiliza projetu ne’e bele implementa iha 2021 no se tarde liu mak tinan 2022,” nia esplika.

Estimativa indimnizasaun ba komunidade afetadu sei bazeia ba padraun ne’ebé iha inklui levantamentu dadus hosi GTI ne’ebé sei hala’o iha tempu badak.

Lansamentu ba GTI ne’e, partisipa husi  Ministru Justisa Manuel Cárceres inklui Vise-Ministru Justisa José Edmundo Caetani, Sekretáriu Estadu Terra no Propriedade Mário Ximenes, Ministru Agrikultura no Peska Pedro Reis,  Vise-Ministru Interiór António Armindo, no Sekretáriu Estadu Ambiente (SEMA), Deométrio do Amaral de Carvalho, Diretór ezekutivu MCC Timor-Leste, Embaixadór Constâncio Pinto.

Iha lansamentu ne’e partisipa mós husi Diretór Jerál no Nasionál hosi ekipa interministeriál, reprezentante Prezidente Autoridade Munisipál Dili, administradór postu administrativu haat, autoridade lokál no komunidade afetadu sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here