Diretor Jeral SEPS, Superintendenti Asistente Polisia, Ismael da Costa Babo. Imajen/Egas Cristovão

DILI, 26 agostu 2020 (TATOLI)–Diretór Jerál Sekretáriu Estadu Protesaun Sivíl (SEPS), Superitendente Ismael da Costa Babo, hateten hakarak livre no moris ho hakmatek hosi konflitu mak presiza kontribui ba pás no estabilidade.

Notísia Relevante: Formasaun ‘Matadalan Mediasaun Sensivél Jéneru’ eleva mediadór DNPKK nia kapasidade

“Se ita hakarak hakmatek maka ita tenke kontribui estabilidade no pás, ide-ne’e importante. Se kazu ne’e sa’e nafatin mak ita haree iha fatór seluk mós kontribui mak konflitu sosiu-ekonómiku. Entaun konflitu ne’e hun mak sé. Mak ita-nia populasaun no ita rasik. Tanba ne’e tenke iha konsiénsia para kontribui ba pás no estabilidade hosi prevensaun. Ho ida-ne’e mak ha’u bele hanoin katak konflitu bele redús,” dehan Ismael da Costa Babo ba jornalista sira iha salaun João Paulo II Comoro, Dili, kuarta ne’e.

Ismael da Costa hateten, ho ida ne’e mak Diresaun Nasionál Prenvensaun Konflitu Komunitária (DNPKK) simu orientasaun hosi Ministru Interiór, Taur Matan Ruak, katak servisu hamutuk ho Konsellu Polisiamentu Komunitária (KPK) atu hakbesik ba ita-nia populasaun no lider komunitária para hatene área mapamentu ne’ebé mak ita konsidera hanesan nivél konflitu boot.

“Ami mós simu ona orientasaun hosi ita-nia Primeiru-ministru hanesan mós Ministru Interiór atu servisu hamutuk ho KPK no lider komunitária sira katak atu hakbesik ba fatin konflitu ka mapamentu konflitu ne’ebé mak boot liu hodi nune’e ita bele tama ho prevensaun no bele prevene,” nia dehan. 

Nia dehan, konflitu saida de’it tenke buka estratejia prevensaun oin-oin atu bele atua no prevene konflitu iha komunidade nia leet, ativamente autoridade komunitária mak esplika ba nia populasaun sira.

Jornalista: Osória Marques

Editór: Cancio Xiemenes

HAKEREK NO HATÁN

Please enter your comment!
Please enter your name here