Portavóz CET no Arcebispo Metropolitana Dili, Dom Virgílio do Carmo da Silva. Imajen Tatoli/Cipriano Colo

DILI, 27 agostu 2020 (TATOLI)-Portavóz Conferência Episcopal Timorense (CET) no Arcebispo Metropolitana Dili, Don Virgílio do Carmo da Silva, rejeita informasaun ne’ebé espalla iha rede sosiál katak igreja katólika sei partisipa asaun pasifíku hasoru Prezidente Repúblika (PR), Francisco Guterres ‘Lú Olo’.

“Relasiona ho informasaun ne’ebé oras ne’e espalla iha públiku (iha mídia sira) katak Uma-kreda atu halo manifestasaun ida, kona-ba manifestasaun ne’e rasik hosi parte Uma-kreda la hatene buat ida no laiha koñesimentu kona-ba asuntu ne’e,” Don Virgílio klarifika liuhosi karta ne’ebé Agência Tatoli asesu, kinta ne’e.

Bispo ne’e afirma katak igreja laiha intensaun no hanoin atu partisipa iha asaun ne’ebé organiza hosi grupu balun.

“Uma-kreda deklara katak laiha hanoin no hakarak ida atu halo manifestasaun ruma hanesan oras ne’e espalla iha públiku,” subliña karta ne’e.

Biban ne’e, Don Virgílio husu ba públiku atu atensaun molok asesu informasaun.

“Bainhira informasaun ne’e to’o autoridade seguransa no sivíl nia tilun, husu atu halo verifika ho autoridade Uma-kreda molok fó sai ba públiku,” nia fó hanoin.

Karta ne’e fó sai hosi Sekretariadu Kámara Eklesiátika ho númeru referénsia 90/CH/VIII/2020 no asina hosi Bispo Dom Virgílio.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here