Xefi Suku Bairopite (liman karuk akompana hela nia komunidade sira hodi simu subsidiu 200 dolar husi Governu iha Sede Suku Bairo Pite, Dili, Kuarta 25 Juinu 2020. Imajen/Antonio Goncalves

DILI, 27 agostu 2020 (TATOLI)–Comissão Antí Corupção (CAC) husu Ministériu Solidaridade Sosiál no Inkluzaun (MSSI) atu halo análiza ba reklamasaun ho kuidadu atu labele hamosu problema ne’ebé hanesan iha pagamentu subsídiu ba dahuluk ne’e.

Notísia Relevante: Governu sei halo análiza ba reklamasaun atu labele mosu problema

“CAC husu MSSI atu halo análiza ba reklamasaun ho kuidadu. Depois hotu tiha ita sei servisu hamutuk ho CAC hodi kruza informasaun bazea ba lista iha CAC depois mak públika loron 15 antes halo pagamentu ba reklamasaun sira-ne’e,” dehan Diretór Jerál MSSI, Rui Manuel Gago Exposto, ba Agência TATOLI iha nia knaar fatin Caicoli, Dili, kinta ne’e. 

Tarde ka sedu, nia dehan, sei halo pagamentu ba reklamasaun hirak ne’ebé mak iha prosesu avaliasaun no análiza nia laran ne’e, tanba osan sei iha hela no asegura hela iha Banku Nasionál Komérsiu Timor-Leste (BNCTL).

“Maibé tarde mak iha análiza ba reklamasaun ne’e tanba tipu reklamasaun la hanesan. Balun husu atu separa hosi nia fixa família nian, balun fali tinan sei kiik hela no hakrak husu para atu fixa ketak hodi simu osan, ita seidauk hatene nia razaun ne’e. Tanba ne’e, presiza halo análiza ba reklamasaun hirak ne’e,” nia dehan. 

Tanba ne’e, nia hatete, Governu labele responde tuir reklamente sira-nia hakarak ba reklamasaun sira-ne’e no reklamasaun hotu sei selu tuir lei ne’ebé iha.

Aleinde ida-ne’e, nia hateten, xefe aldeia no xefe suku sira mós husu hela de’it prosesu pagamentu ba reklamasaun nian tanba dehan reklamante sira mak ejize.

“Ita tenke klama lai tanba buat ne’e la fasil atu foti solusaun, presiza halo análiza profunda no hatene konteudu hosi reklamasaun ne’e rasik. Ita labele naran selu de’it tanba iha lei hodi bazeia bai da-ne’e,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here