Ponte B.J. Habibie Bidau Santa Ana. Imajen Tatoli/António Gonçalves

DILI, 26 agostu 2020 (TATOLI)-Vise Primeiru-Ministru no Ministru Planu no Ordenamentu, José Maria dos Reis, informa maski Ponte B.J Habibie, iha Bidau Santa Ana, konklui ona iha tinan kotuk maibé kompañia Bhakti Karya, Lda, (BTK) husu tan kustu adisionál ba dezeñu.

Tuir governante ne’e, pagamentu másimu konklui ona ho kustu $3.963.319,62 maibé iha reuniaun tékniku Konsellu Administrasaun Fundu Infraestutura (KAFI) no Ajénsia Dezenvolvimentu Nasionál (ADN), kompañia aprezenta kustu adisionál ba dezeñu ho montante $42.000.

“Ha’u la aprova iha diskusaun KAFI tanba razaun se dezeñu ne’e kompañia mak halo no tuir dezeñu ne’ebé iha, Tanba ne’e responsabilidade kompañia nia rasik,” tenik governante ne’e ba Agência Tatoli, foin lalais ne’e, iha ninia knaar fatin, Fatuhada. 

Kompañia argumenta, tuir kontratu ai-riin tama ba rai okos metru 27, maibé kompañia halo liu fali ba metru 33 to’o 47.

“Kompañia mak halo dezeñu rasik hodi implementa kedan ne’e tenke iha responsabilidade rasik ba dezeñu, la’ós mai husu Governu atu aumenta tan orsamentu adisionál. Governu labele responsabiliza saida mak kompañia halo, kompañia nia responsabilidade ba dezeñu sira no identifika pontu inklui levantamentu dadus  hodi halo tuir dezeñu,” akresenta.

Aleinde ne’e, Ministru Planu no Ordenamentu ne’e dehan, Governu labele selu tan adisionál tanba projetu ne’e hotu ona.

“Se ponte ne’e hotu ona nusa maka dezeñu agora tenke iha, tuir loloos halo ponte ne’e tuir dezeñu no hafoin dezeñu hotu maka tama ba faze konstrusaun projetu, maibé agora hafoin inaugura ponte besik tinan ida maka foin mosu kustu adisionál ba dezeñu,” nia subliña.

Tuir Ministru, demográfikamente ponte ne’e ideál duni tanba iha mota, maibé presiza garante kualidade, no tuir duni dezeñu ne’ebé sita ona iha kontratu. 

Tanba ne’e Ministru sei husu auditoria atu hatene loloos lala’ok konstrusaun ponte.

“Ha’u sei husu auditoria ida atu hatene loloos sala iha ne’ebé, se sala iha kompañia nia tenke resposabiliza no sala iha Governu tenke responsabiliza atu selu,” nia realsa.

Maski nune’e, Vise PM seidauk bolu empreza BTK atu halo esplikasaun ba orsamentu adisionál ne’e, maibé husu ona iha KAFI atubele diksute kestaun ho Diretór ADN foun atu buka hatene loloos projetu Ponte B.J Habibie ho projetu sira seluk tan.

Iha loron 29 agostu 2019, iha ámbitu komemorasaun loron konsulta populár ba dala-20 (30 agostu 1999-30 agostu 2019) no Misaun INTERFET (Forsa Internasionál ba Timor-Leste), Governu inaugura Ponte B.J Habibie.

Ministru Obra Públiku no Abitasaun, Mochamad Basuki Hadimuljono, ne’ebé reprezenta Prezidente Repúblika Indonézia, Joko Widodo, iha inaugurasaun ne’e agradese ba Estadu Timor-Leste ne’ebé tau ponte ida ho naran eis Prezidente datoluk Indonézia.

Projetu konstrusaun Ponte BJ Habibie ne’e konstrui liuhosi númeru kontratu S55/122/MOPTC, 2017 ho durasuan  hahú 31 agostu 2017 to’o 31 agostu 2019.

Ponte ne’e ho luan metru 10,5 no naruk metru 78 no tuir kontratu kompañia sei kontinua halo manutasaun hahú husi loron inaugurasaun nian to’o fulan neen.

Kona-ba kestaun ne’e, Agência Tatoli tenta atu konfirma kompañia BTK maibé seidauk konsege.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Ponte ki’ik ida nia kustu millaun 3 rsin ne’e loos duni ka lae. Konkorda ho resposta Ministru nian, nuxa maka ponte inaugura kle’ur ona maibe agora husu fali adisional kona-ba dezenu. Ne’e naran esplorasaun.

HAKEREK NO HATÁN

Please enter your comment!
Please enter your name here