Iha ambitu seremónia despedida Prezidente Agência Tatoli, José da Costa, ne’ebé partisipa hosi Ministru Asuntu Parlamentár Komunikasaun Sosiál, Francisco Jerónimo no Sekretáriu Estadu Komunikasaun Sosiál, Merício Juvinal dos Reis ‘Akara’, iha edifísiu Agência Tatoli, Farol, kuarta (26/08). Imajen Tatoli/António Gonçalves

DILI, 26 agostu 2020 (TATOLI)-Ministru Asuntu Parlamentár Komunikasaun Sosiál (MAPKOMS), Francisco Jerónimo, konsidera Prezidente Agência Tatoli, José da Costa, hanesan jestór di’ak tanba maski la mai hosi área mídia, maibé konsege jere mídia estatál ne’e no hetan progresu di’ak.

Governante ne’e ko’alia iha ámbitu seremónia despedida Prezidente Agência Tatoli, José da Costa, molok husik kargu iha loron 31 agostu tinan ne’e.

“Ha’u mai atu serbisu no lori prosesu sira ba oin. Señor José maski la’ós background jornalista no laiha esperiénsia iha área mídia maibé nia iha kapasidade atu jere instituisaun mídia ne’ebé boot tebes. Bainhira nia ko’alia verbál no hato’o karta rezignasaun ofisiál ba ha’u, ha’u sente lakon boot,” tenik Ministru Franscisco, iha salaun Borja da Costa, Agência Tatoli, Farol, kuarta ne’e.

Notísia Relevante: MAPKOMS simu karta rezignasaun Prezidente Agência Tatoli,IP

Tuir governante ne’e, maski koñese Prezidente no ekipa Tatoli la kleur, maibé bele hatene ona vizaun mídia estatál ne’e.

“Deperente mai ho karta rezignasaun, ha’u hanoin barak no dehan MAPKOMS lakon prosesu ida, tanba ema ne’ebé bele fó esperansa ba MAPKOMS nia futuru di’ak liu husik ona Tatoli. Maibé ita hotu rekoñese katak situasaun hanesan ne’e sempre akontese iha tempu saida de’it, tanba ne’e ita tenke prontu asume, biar dalaruma todan maibé tenke hamutuk tanba ho hamutuk buat todan bele sai kamaan,” nia akresenta.

Ministru Asuntu Parlamentár Komunikasaun Sosiál (MAPKOMS), Francisco Jerónimo. Imajen Tatoli/António Gonçalves

Ministru haktuir, nia konsege husu Prezidente Tatoli hodi kontinua lidera Tatoli no fó tempu ba nia hodi halo subtituisaun, maibé José da Costa hakarak kontinua karreira iha fatin seluk.

Nia mós nota katak Konsellu Diretivu Agência Tatoli, kompostu hosi Prezidente no Vise-Prezidente na’in-rua hetan nomeasaun ba tinan-haat tuir estatutu.

“Labele hanoin ha’u mai hanesan Ministru atu hasai ema arbiru tuir gostu. Seluk bele halo maibé ha’u mai atu serbisu ho ita bo’ot sira, la’ós atu hasai ita bo’ot sira, ida ne’e maka ha’u komunga. Iha reuniaun ho Diretór sira, ha’u sempre ko’alia katak ha’u mai la’ós atu lori vingansa maibé mai halo serbisu ho susesu ba instituisaun tuir vizaun VIII Governu Konstitusionál,” nia subliña.

Tanba ne’e, nia husu ba Prezidente Tatoli, maski despede ona ho Tatoli  hodi ba halo knaar iha fatin seluk, maibé ba oin tenke konta nafatin Tatoli.

“Ha’u hameno de’it buat ida ba ita bo’ot, kontinua karreira iha fatin foun maibé labele haluha Tatoli hanesan fatin atubele disemina informasaun. karik  iha tempu hakarak mai Tatoli  halo konversa no deskute halo favor, karik hakarak ba MAPKOMS atu ko’alia buat ruma, ami prontu no nunka taka odomatan ba ita bo’ot,” Ministru dehan.

SEKOMS apresia serbisu Prezidente Agência Tatoli

Iha biban hanesan, Sekretáriu Estadu Komunikasaun Sosiál, Merício Juvinal dos Reis ‘Akara’ louva no apresia Prezidente Agência Notisioza Timor-Leste-Tatoli, José da Costa, ninia serbisu no dedikasaun tomak durante sai líder konsege hatudu serbisu di’ak hodi dezenvolve no profisinaliza Tatoli hodi di’ak.

Tanba ne’e, governante ne’e iha esperansa Prezidente foun ne’ebé troka José da Costa bele hatutan misaun ne’ebé mídia online ne’e halo ona.

“Apresia Señor José ninia dedikasaun durante tinan ida ho balun, ha’u espera Prezidente foun bele hatutan misaun ne’e to’o ramata.

Akara mós mós husu media estatál  ne’e atu hatudu serbisu di’ak nafatin, nune’e mós nia parte dezeja Prezidente sesante Agênsia Tatoli susesu iha fatin foun.

José da Costa nomeadu nu’udar Prezidente Konsellu Diretivu Ajénsia Notisioza Timor-Leste Tatoli ba mandatu tinan-haat liuhosi desizaun Konsellu Ministru iha loron 5 dezembru 2018, hafoin simu pose iha 21 dezembru 2018 no hala’o serbisu loloos iha inísiu janeiru 2019 to’o agora.

Proposta nomeasaun ne’e aprezenta hosi Sekretáriu Estadu Komunikasaun Sosiál, Merício Juvinal dos Reis ‘Akara’, tanba antes ne’e Agência Tatoli tutela ba SEKOMS, maibé ho mudansa orgánika VIII Governu, mídia Estadu ne’e agora tutela fali ba MAPKOMS.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here