Ministru Asuntu Parlamentár Komunikasaun Sosiál (MAPKOMS), Francisco Jerónimo. Imajen Tatoli/António Gonçalves

DILI, 26 agostu 2020 (TATOLI)-Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten maski mudansa iha nível Konsellu Diretivu Agência Tatoli, maibé husu ekipa redasaun no administrasaun sira hodi serbisu ho profisionál.

“Ha’u hakarak husu ida de’it, Tatoli tenke la’o ba oin no tenke profisionál,” Ministru Francisco iha seremónia despedida Prezidente Agência Tatoli, José da Costa, iha salaun Borja da Costa, edifísiu Agência Tatoli, kuarta ne’e.

Governante ne’e dehan, Ministériu Asuntu Parlamentár no Komunikasaun Sosiál (MAPKOMS) no Sekretaria Estadu Komunikasaun Sosiál (SEKOMS) promete hakarak apoia mídia estatál rua sai forte nafatin.

“Ami-nia prezensa iha ne’e hatudu apoiu sempre forte nafatin no sei dudu ita bo’ot sira ba oin nafatin. Ita bo’ot sira tenke ba oin, Rádiu Televizaun Timor-Leste (RTTL) no Tatoli tenke sai ema ida de’it no labele halai tuir fali ema seluk,” nia akresenta.

Ministru Francisco dehan, nia la arrepende ba despedida Prezidente Tatoli maibé arrepende ba hasoru malu.

“Ha’u arrepende tanba pertemuan, bainhira ha’u hasoru Señor José, ha’u iha hanoin ida bainhira ha’u mai vizita iha ne’e durante akompaña aprezentasaun no halo diskusaun, hatene ona saida maka Tatoli hakarak atinje ba oin,” nia akresenta.

Maibé hafoin Ministru enkontru ho Prezidente Tatoli hodi hateten intensaun atu rezignasaun maka halo Ministru arrepende.

“Dinámika situasaun maka hanesan ne’e duni, tanba ne’e ita hotu tenke simu no dala ruma balun tenke tanis no laran moras tanba situasaun ne’e sempre mosu mai ita,” nia subliña.

Nia haktuir, bainhira Prezidente Tatoli hato’o karta rezignasaun, nia preokupa tebes.

“Ha’u dehan ba Señor Sekretáriu Estadu katak ha’u preukupa tanba fofoun mai ha’u seidauk koñese ema barak, maibé koñese ema sira ne’e maka dirijente maibé komesa la’o di’ak oituan derepente deside rezigna-an. Ha’u agora iha hanoin ida halo nusa maka ha’u halo  subtituisaun,” nia realsa.

Tanba ne’e, tempu badak Ministru sei halo nomeasaun ba Prezidente Agência Tatoli interinu ba mandatu to’o dezembru 2020.

“Ha’u sei la hili ema husi  li’ur mai tama iha Tatoli no sei haree ema ne’ebé maka iha Tatoli duni, ne’ebé maka tuir ha’u-nia avaliasaun katak bele, ha’u sei tau nia ba Prezidente interinu to’o dezembru, hafoin sei foti desizaun permanente. Interinu hodi fó tempu atu haree no halo avaliasaun di’ak liu tanba ita hotu iha prosesu kontrusaun Estadu no aprende,” nia afirma.

Tuir Ministru, Prezidente Tatoli foun sei nomea permanente iha janeiru 2021.

“Presidente  Tatoli  sesante nia mandatu sei hotu 31 agostu agora, tanba ne’e husik ha’u  haree Prezidente interinu lai atu dirije Tatoli provizóriu to’o dezembru no 01 janeiru ba oin iha ona permanente,” Ministru garante.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here