Ministru Administrasaun Estatál, Miguel Pereira de Carvalho. Imajen Tatoli/Egas Cristovão

DILI, 26 agostu 2020 (TATOLI)-Iha fulan-agostu ne’e, Ministériu Administrasaun Estatál (MAE) hahú loke rekrutamentu ba autoridade munisipál, tanba ne’e Ministru Administrasaun Estatál, Miguel Pereira de Carvalho, husu autoridade sira mantein serbisu to’o finaliza prosesu rekrutamentu.

“Hanesan funsionáriu públiku, sira tenke kontinua mantein serbisu to’o prosesu rekrutamentu hotu no fó pose atu subtitui sira,” tenik Ministru Miguel iha Pálasiu Governu, kuarta ne’e.

Rekrutamentu méritu ba autoridade munisipál iha parte leste finaliza ona no tempu badak lista provizóriu ba kadidatura sira sei fó sai ba públiku.

“Ministériu Administrasaun Estatál hahú ona halo rekrutamentu méritu ba Prezidente Autoridade Baucau, Viqueque no Lautém no tempu tuir mai sei loke ba munisípiu sira seluk,” nia informa.

Notísia Relevante: Governu Hahú Estabelese Estrutura Munisipál Hodi Dudu Prosesu Desentralizasaun

Nia ne’e dehan, ba munisípiu tolu ne’e, progresu ikus liu juri rekrutamentu sira simu ona lista kandituratura sira.

Governante ne’e subliña, razaun halo rekrutamentu méritu ne’e tanba autoridade munisipál sira ninia mandatu ramata ona.

Rekrutamentu pur méritu ne’e ba dahuluk realiza hodi haree kandidatu forte ne’ebé prenxe kritériu no rekizitu, tuir dekretu-lei númeru 03/2016, katak sira ne’ebé prenxe kritériu maka bele kandidata-an.

Aleinde ne’e, rekrutamentu ba administradór munisipál iha ámbitu deskonsentrasaun administrasaun territoriál.

MAE sei iha kompeténsia halo rekrutamentu tanba lei lima ba estabelisementu poder lokál ba desentralizasaun administrativa hanesan Lei Poder Lokál, Lei Finansiamentu Lokál, Lei Aprovizionamentu Lokál, Lei Eleisaun Munisipál, no Lei Patrimóniu Lokál seidauk hetan aprovasaun.

Bainhira lei lima ne’e aprova ona no to’o iha faze desentralizasaun administrativa maka sei realiza eleisaun munisipál, ne’ebé autoridade munisipál sei hili hosi povu sira.

Polítika desentralizasaun administrativa antes ne’e Governu anteriór inísia ho Lei Poder Lokál atu hahú prosesu desentralizasaun, maibé ikus mai Prezidente Repúblika veta iha setembru 2017 tanba preokupa ho kontrolu Governu sentrál bele lakon ba administradór sira.

Governu sentrál hakarak estabelese poder lokál, bazea ba konstituisaun Republika Demokrátika Timor-Leste (RDTL) artigu 72, ne’ebé ko’alia kona-ba estabelesementu poder lokál.

Jornalista: Florêncio Miranda Ximenes

Editora: Julia Chatarina        

HAKEREK NO HATÁN

Please enter your comment!
Please enter your name here