Ministra Negósiu Estranjeiru no Kooperasaun (MNEK), Adalgiza Albertina Xavier Reis Magno. Imajen/Egas Cristovão

DILI, 26 agostu 2020 (TATOLI)-Governu liuhosi Ministériu Negósiu Estranjeiru no Kooperasaun (MNEK), iha tempu badak sei selu tan subsídiu faze daruak nian ba estudante naun bolseiru Timoroan 500-resin ne’ebé daudaun ne’e estuda iha nasaun hitu iha rai-liur.

Governu oferese subsídiu ne’e ba estudante naun bolseiru iha rai-liur relasiona ho pandemia globál surtu COVID-19.

Notísia Relevante :Estudante Naun Bolseiru iha Portugal Simu Ona Subsídiu

Ministra Negósiu Estranjeiru no Kooperasaun, Adaljiza Magno, hateten estudante Timoroan hirak ne’e seidauk simu subsídiu husi Governu iha faze dahuluk nian, ne’ebé MNEK halo iha fulan kotuk.

Tuir planu Governu sei halo pagamentu ba benefisiáriu hirak ne’e hafoin Konsellu Ministra aprova alterasaun dekretu Governu nian ne’e iha semana oin.

“Alterasaun lei ba pagamentu estudante hirak ne’e prosesu ona sei halo aprovasaun semana oin, pagamentu ne’e ba estudante iha nasaun hitu,” dehan Adaljiza, ba Tatoli iha Palacio do Governo Dili, kuarta (26/08).

Estudante naun bolseiru 500-resin daudaun ne’e estuda iha nasaun Repúblika Populár Banglades, Reinu Béljica, Repúblika Populár Xina, Repúblika Koreia Súl, Reinu Unidu da Grã-Británia no Irlánda Norte, Repúblika Mozambique no Singapura.

Kona-ba totál orsamentu hira maka MNEK sei uza hodi selu estudante hirak ne’e, Governante dehan Konselu Minsitru seidauk aprova proposta ne’ebé maka MNEK propoin ona antes ne’e.

Entretantu, iha pagamentu faze dahuluk nian, Governu halo ona ba estudante naun bolseiru hamutuk 2.000-resin ne’ebé estuda iha Áfrika, Ázia, Filipina, Indonézia, Austrália, Europeia, Amérika no seluk tan.

Notísia Relevante :Timoroan iha Indonézia simu ona subsídiu husi Governu

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here