Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (26/08). Imajen Tatoli/Egas Cristovão

DILI, 26 agostu 2020 (TATOLI)-Governu liuhosi reuniaun Konsellu Ministru (KM) diskute estatutu foun Ajénsia Dezenvolvimentu Nasionál (ADN) ne’ebé maka aprezenta hosi Vise Primeiru-Ministru no Ministru Planu no Ordenamentu, José Maria dos Reis.

“Vise-Primeiru-Ministru aprezenta ba Konsellu Ministru kona-ba opsaun polítika no lejizlativa hosi projetu estatutu foun Ajénsia Dezenvolvimentu Nasionál (ADN) nian,” dehan Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun KM, iha Palásiu Governu, kuarta ne’e.

Preparasaun estatutu foun ADN nian ne’e buka atu klarifika misaun, atribuisaun no estrutura sira hosi serbisu instituisaun ne’e, nune’e ninia mós ninia ligasaun ho instituisaun Estadu sira seluk.

ADN estabelese iha 2011 hosi IV Governu Konstitusionál, ho kompeténsia atu avalia forma rigoroza ba projetu kapitál dezenvolvimentu ne’ebé bazeada ba análize hosi kustu benefísiu, monitoriza ba implementasaun no ezekusaun projetu liuhosi sistema sertifikasaun ida ho kualidade.

Nune’e mós, kontribui ba rasionalizasaun rekursu finanseiru ne’ebé disponível ba dezenvolvimentu nasionál no atividade ekonómika ba nível nasionál no lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here