Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (26/08). Imajen Tatoli/Egas Cristovão

DILI, 26 agostu 2020 (TATOLI)-Governu liuhosi reuniaun Konsellu Ministru (KM) halo aprovasaun ba projetu dekretu-lei, ne’ebé aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno.

“Proposta ne’ebé aprezenta ho ninia objetu maka halo alterasaun dahuluk ba dekretu lei númeru 20/2019, 31 jullu kona-ba orgánika Ministériu Negósiu Estranjeiru no Kooperasaun (MNEK) nian,” relata Ministru Prezidénsia konsellu MInistru, Fidelis Manuel Leite Magalhães hafoin ramata reuniaun ezekutivu iha Palásiu Governu, kuarta ne’e.

Alterasaun ne’e ninia objetivu mak atu halo ajustamentu nesesáriu, tuir alterasaun ba Lei Orgánika VIII Governu Konstitusionál, ho estinsaun ba servisu balun no halo ajustamentu estruturál ba servisu internu ministériu ne’e nian atu kumpre kritériu sira kona-ba governasaun di’ak, transparénsia no jestaun institusionál.

Ho introdusaun podér koordenasaun hosi Sekretaria Jerál no kriasaun diresaun nasionál foun sira, fó kompeténsia funsionál rasik atubele evita konflitu interese ne’ebé bele mosu.

MNEK responsável ba konseitu, koordenasaun no ezekusaun polítika esterna, ne’ebé difine no aprova hosi Konsellu Ministru, ba área diplomasia no kooperasaun internasionál.

Hanesan mós responsável ba promosaun no defeza interese Repúblika Demokrátika Timor-Leste (RDTL) no sidadaun sira iha rai-li’ur.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here