Ekipa Observasaun Konsulta Popular 1999 iha Timor-Leste. Imajen/Espesial.

DILI, 25 agostu 2020 (TATOLI)—Líder Forsa Libertasaun Nasionál Timor-Leste (FALINTIL), Vidal de Jesus “Riak Leman” hateten Timor-Leste manán Indonézia liuhosi votasaun Konsulta Popular 30 agostu 1999 tanba povu Timorense organizadu no orientadu.

Notísia Relevante: Tinan 1999: Rona rádiu “Mau-Hudo” ba Kupang, “Mau-Huno” monu dezmaia

Jornalisyta TATOLI Entrevista, Riak Leman. Imajen/Osoria Marques.

“Momentu ne’ebá ne’e ita sempre iha esperansa katak ita manán iha 30 agostu 1999. Tanba, kultura klandestina monta hahú hosi rejiaun, sub-rejiaun, zona, nuref no celcom. Ita-nia populasaun bem organizadu, bem orientadu tanba ne’e mak rezultadu votasaun ne’e maioria vota ba ukun-aan. Uitoan de’it mak vota ba integrasaun,” Riak Leman informa ba Agência TATOLI, iha nia kna’ar-fatin, Matadoru, tersa ne’e.

Líder FALINTIL ne’e mós louva povu Timorense iha momentu ne’ebá, tanba hotu-hotu hatene katak dalan ba referendu mak dalan ida-ne’ebé loos liu.

“Ita-nia funu ne’e ninia objetivu maka atu ukun rasik-aan. Ita lakohi ema hosi rai seluk mai kontinua invade ita-nia rain. Tanba ne’e maka FALINTIL sira kumpre misaun ida hodi kontinua funu iha ai-laran to’o ramata,” nia dehan. 

Nia haktuir, iha momentu molok tama ba 30 agostu 1999, povu maioria hatene ona sei vota ba ukun rasik-aan tanba ezisténsia organizasaun polítika iha baze metin.

Membru UNAMET sura votu iha Sede UNAMET Balide, Dili. Imajen/Espesial.

“Momentu ne’e ita konvense ka esklarese ba povu ne’e la barak ida. Povu maioria tuir de’it. Ha’u bele dehan iha 1994, estrutura iha Same metin, Manatuto mós metin hotu. Iha 1995, estrutura iha Aileu metin no 1996 ha’u tún mai Dili no estrutura metin hotu. Ha’u la’o hela iha vila laran, milísia sira la hatene ida tanba povu tomak ita-nian, só bapa hatene ne’e só ema ruma mak informa, maibé ida-ne’e la akontese,” nia dehan. 

Nia haktuir, dalaruma nia tuun mai vila liuliu iha Sidade Dili, iha uma dada bee posu mós militár sira hanoin povu baibain no dalaruma pasear ho karreta la’o iha Dili laran mós militár no HANSIP sira la’o ba mai haree hetan ne’e dalabarak sira lahatene no la kuñese.

“Ha’u loron-loron bomba hela bee-moos, hansip sira la’o ba-mai mós la hatene ha’u, até ha’u ho karreta própriu la’o haleu Dili laran, nein ema-ida fó hatene dehan ha’u ema ai-laran ka FALINTIL, afinál povu hatene hela, tan ne’e mak ha’u dehan ita-nia bem organizadu no orientadu,” dehan Prezidente Konsellu Veteranu Kombatente Libertasaun Nasionál ne’e.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here